નોઈડાના પ્રખ્યાત નિઠારી કેસમાં અલ્હાબાદ હાઈકોર્ટના નિર્ણય બાદ હવે મનિન્દર સિંહ પંઢેરની મુક્તિની ચર્ચા પણ તેજ થઈ ગઈ છે. કહેવામાં આવી રહ્યું છે કે હાઈકોર્ટના નિર્ણય બાદ મનિન્દર સિંહ પંઢેર પાસે હવે કોઈ પણ કેસમાં સજા બાકી નથી, તેથી આવતીકાલ સુધીમાં તેમને જેલમાંથી મુક્ત કરવામાં આવી શકે છે. સોમવારે હાઈકોર્ટે નિઠારી કેસમાં 12 કેસમાં સુરેન્દ્ર કોલી અને 2 કેસમાં મનિન્દર સિંહ પંઢેરને નિર્દોષ જાહેર કર્યા હતા અને ફાંસીની સજા પણ રદ કરી હતી.
નિઠારી ઘટના અંગે પંઢેર સામે કુલ 6 કેસ નોંધાયા હતા. સીબીઆઈ ટ્રાયલ કોર્ટ દ્વારા તેને પહેલા જ ત્રણ કેસમાં નિર્દોષ જાહેર કરવામાં આવ્યો છે. એક કેસમાં હાઈકોર્ટે તેને નિર્દોષ જાહેર કરી દીધો હતો, જ્યારે બાકીના બે કેસમાં તેને ફાંસીની સજા ફટકારવામાં આવી હતી, જે હવે હાઈકોર્ટ દ્વારા રદ કરવામાં આવી છે.
CBI સુપ્રીમ કોર્ટમાં પડકારી શકે છે
આ રીતે જોતા હવે તેને જેલમાંથી મુક્ત કરવાનો સમય આવી ગયો છે. જોકે, સીબીઆઈએ કહ્યું છે કે તે હાઈકોર્ટના નિર્ણયને સુપ્રીમ કોર્ટમાં પડકારશે. સીબીઆઈના વકીલ સંજય કુમાર યાદવે કહ્યું છે કે હાઈકોર્ટ અને સુપ્રીમ કોર્ટે આ પુરાવાના આધારે કોલીને આપવામાં આવેલી ફાંસીની સજાને યથાવત રાખી છે. આવી સ્થિતિમાં હાઈકોર્ટનો આ નિર્ણય આશ્ચર્યજનક છે.
પ્રત્યક્ષ સાક્ષી ન હોવાનો ફાયદો મળ્યો
યાદવે કહ્યું કે હાઈકોર્ટના આદેશની કોપી વાંચ્યા બાદ સીબીઆઈ લીગલ ટીમ તેને સુપ્રીમ કોર્ટમાં પડકારવાની ભલામણ કરી શકે છે. તમને જણાવી દઈએ કે ગાઝિયાબાદની સીબીઆઈ કોર્ટે બંને ગુનેગારોને ફાંસીની સજા સંભળાવી હતી, પરંતુ હવે અલાહાબાદ હાઈકોર્ટે સીધા પુરાવા અને સાક્ષીઓના અભાવે બંને દોષિતોને નિર્દોષ જાહેર કરી દીધા છે.
