આદિયોગી પર મહાશિવરાત્રિનો ભવ્ય મહોત્સવ: રક્ષા મંત્રી રાજનાથ સિંહ, દેવેન્દ્ર ફડણવીસ સહિત મહાનુભાવો હાજર

ઈશા યોગ કેન્દ્રમાં મહાશિવરાત્રિ 2026ની ભવ્ય ઉજવણીમાં કેન્દ્રીય રક્ષા મંત્રી રાજનાથ સિંહે ભાગ લીધો: "આશ્રમ પર મહાદેવની કૃપા છે" કહી ધ્યાનલિંગમાં પંચ ભૂત ક્રિયા કરી. સદ્‍ગુરુએ ભવ્ય ભારત ભૂષણની શરૂઆત કરી, રાજનાથ સિંહે એવોર્ડ આપ્યા. "આધ્યાત્મ એક વિજ્ઞાન છે" – વિગતો જુઓ.

આદિયોગી પર મહાશિવરાત્રિનો ભવ્ય મહોત્સવ: રક્ષા મંત્રી રાજનાથ સિંહ, દેવેન્દ્ર ફડણવીસ સહિત મહાનુભાવો હાજર

"અહીં હું જે દિવ્યતાનો અનુભવ કરી રહ્યો છું તે સ્પષ્ટપણે દર્શાવે છે કે આ સ્થળ પર દેવોના દેવ મહાદેવની કૃપા છે," આજે સાંજે કોઈમ્બતુરના ઈશા યોગ કેન્દ્ર ખાતે મહાશિવરાત્રિની ઉજવણીને સંબોધતા કેન્દ્રીય રક્ષા મંત્રી શ્રી રાજનાથ સિંહે આ શબ્દો કહ્યા. રક્ષા મંત્રી ઈશાના આ વાર્ષિક રાત ભર ચાલતા સાંસ્કૃતિક મહોત્સવના મુખ્ય અતિથિ હતા, જેની શરૂઆત આજે સાંજે 6 વાગ્યે થઈ અને જે આવતીકાલે સવારે 6 વાગ્યા સુધી ચાલશે. ઉજવણીમાં શ્રી રાજનાથ સિંહ, મહારાષ્ટ્રના મુખ્યમંત્રી શ્રી દેવેન્દ્ર ફડણવીસ અને તેમના પત્ની શ્રીમતી અમૃતા ફડણવીસ તેમજ રમતવીરો, ઉદ્યોગ જગતના આગેવાનો, કલાકારો, ગાયકો અને પરફોર્મર્સ સહિતના અનેક રાજકીય અને અન્ય મહાનુભાવો સામેલ હતા. મહાશિવરાત્રિ એ ઈશાનો સૌથી ભવ્ય વાર્ષિક ઉત્સવ છે જે દર વર્ષે આદિયોગીની ઉપસ્થિતિમાં યોજાય છે. સદ્‌ગુરુ આખી રાત કાર્યક્રમોનું નેતૃત્વ કરે છે.

"જ્યારે માનવતા તણાવ, ચિંતા અને આંતરિક અશાંતિમાંથી પસાર થઈ રહી છે, ત્યારે ભગવાન શિવની સાર્થકતા વધુ ગહન બની જાય છે. શિવ એક જીવંત સંભાવના છે, એક એવી સંભાવના જે આપણને બતાવે છે કે અરાજકતા વચ્ચે પણ સંતુલન કેવી રીતે જાળવવું. તેઓ સંપૂર્ણ આંતરિક શાંતિનું અને તે જ સમયે કર્મ અને રૂપાંતરણનું પ્રતીક છે," રક્ષા મંત્રીએ તેમના સંબોધનમાં કહ્યું. તેમણે ઉમેર્યું કે સદ્‍ગુરુએ મહાશિવરાત્રિને એક "આંતરરાષ્ટ્રીય આધ્યાત્મિક ઉજવણી" બનાવી છે અને એ દર્શાવ્યું છે કે "આધ્યાત્મ એક વિજ્ઞાન છે જે જીવનને વધુ અસરકારક અને વધુ સંતુલિત બનાવે છે."

હાજર રહેલા અન્ય પ્રતિષ્ઠિત મહાનુભાવોમાં માહિતી અને પ્રસારણ તેમજ સંસદીય બાબતોના કેન્દ્રીય રાજ્ય મંત્રી ડૉ. એલ. મુરુગનનો સમાવેશ થાય છે. દેશભરના અનેક પ્રતિષ્ઠિત મહાનુભાવો, આધ્યાત્મિક આગેવાનો અને કલાકારો પણ આ મહોત્સવમાં હાજરી આપશે.

અગાઉ સાંજે, સદ્‍ગુરુએ યોગ સેન્ટર ખાતે શ્રી રાજનાથ સિંહનું સ્વાગત કર્યું જ્યાં તેમણે અને અન્ય મહાનુભાવોએ ધ્યાનલિંગ ખાતે સદ્‍ગુરુ દ્વારા આયોજિત પંચ ભૂત ક્રિયામાં (પાંચ તત્વોની શુદ્ધિ) ભાગ લીધો. ધ્યાનલિંગ સદ્‍ગુરુ દ્વારા મુક્તિના દ્વાર તરીકે પ્રાણ-પ્રતિષ્ઠિત એક અનોખું શક્તિશાળી ઊર્જા સ્વરૂપ છે.

ત્યારબાદ તેમને ઉજવણીના મુખ્ય સ્થળ, આઈકોનિક આદિયોગી સુધી લઈ જવામાં આવ્યા. રક્ષા મંત્રી શ્રીએ યોગેશ્વર લિંગને કૈલાશ તીર્થમ અર્પણ કર્યું અને વિશ્વભરમાં યોગના પ્રસારના પ્રતીક મહાયોગ યજ્ઞનો દીપ પ્રગટાવીને રાતભર ચાલતી ઉજવણીનો પ્રારંભ કર્યો. ઉજવણીની શરૂઆત ભવ્ય લિંગ ભૈરવી ઉત્સવ મૂર્તિ શોભાયાત્રા અને મહાઆરતી સાથે થઈ.

કાર્યક્રમમાં મહાનુભાવો અને પ્રેક્ષકોનું સ્વાગત કરતાં, સદ્‍ગુરુએ અત્યારના સમયમાં આદિયોગી અને તેમના સંદેશની સાર્થકતા વિશે વાત કરી. "આદિયોગી ભૂતકાળના નથી. આદિયોગી ભવિષ્યના છે કેમ કે તેમણે જે આપ્યું તે માન્યતા, ફિલસૂફી, વિચારધારાઓ કે ઉપદેશો નથી, તે સુખાકારી માટેની ટેકનોલોજી છે." તેમણે કહ્યું કે આગામી દાયકા કે બે દાયકામાં, "આપણે સુખાકારી માટેની ટેકનોલોજીને (વૈશ્વિક સ્તરે) એક જબરદસ્ત શક્તિ બનતી જોવા માંગીએ છીએ. ઉપર જોવાનું નહીં. અંદર જોવાનું. અંદરની તરફ વળવું એ જ એકમાત્ર રસ્તો છે."

સદ્‍ગુરુએ ભવ્ય ભારત ભૂષણની પણ શરૂઆત કરી, જે એવા લોકોને સન્માનિત કરવા અને ઉજવવા માટેની પહેલ છે જેમણે "ભવ્ય ભારતના નિર્માણમાં યોગદાન આપ્યું છે અથવા યોગદાન આપી રહ્યા છે." રક્ષા મંત્રીએ સન્માનિત કરવામાં આવેલા લોકોને એવોર્ડ આપ્યો. શ્રી નંબી નારાયણ અને શ્રી કિરણ કુમાર (વિજ્ઞાન અને ટેકનોલોજી), શ્રીમતી અલરમેલ વલ્લી (શાસ્ત્રીય નૃત્ય), શ્રીમતી એન. રાજમ (સંગીત), શ્રી વિક્રમ સંપથ (ઇતિહાસ અને સંસ્કૃતિ), શ્રીમતી સાયના નેહવાલ (રમતગમત), એર માર્શલ જીતેન્દ્ર મિશ્રા, લે. જનરલ એવીએસ રાઠી અને વાઇસ એડમિરલ આરવી ગોખલે (ઓપરેશન સિંદૂરના સન્માનમાં) વગેરેને એવોર્ડથી સન્માનિત કરવામાં આવ્યા.

"ગંગા" થીમ સાથે, આ વર્ષની મહાશિવરાત્રિ પવિત્ર નદીના આધ્યાત્મિક, સાંસ્કૃતિક અને પર્યાવરણીય પરિમાણોને પ્રકાશિત કરશે અને તેમાં સદ્‌ગુરુ દ્વારા માર્ગદર્શિત શક્તિશાળી ધ્યાન, ઊર્જાવાન સંગીત અને નૃત્ય પ્રદર્શન અને અગ્રણી ભારતીય કલાકારો દ્વારા જીવંત પ્રસ્તુતિઓ રહેશે.

Share On Social Media