ભાજપમાં નીતિન નવીન યુગનો પ્રારંભ! 45 વર્ષની વયે બનશે સૌથી યુવા રાષ્ટ્રીય અધ્યક્ષ, PM મોદીની હાજરીમાં થશે સત્તાવાર જાહેરાત

નીતિન નવીન ભાજપના સૌથી યુવા રાષ્ટ્રીય અધ્યક્ષ તરીકે બિનહરીફ ચૂંટાયા. PM મોદી ની હાજરીમાં 20 જાન્યુઆરીએ થશે સત્તાવાર જાહેરાત.

ભાજપમાં નીતિન નવીન યુગનો પ્રારંભ! 45 વર્ષની વયે બનશે સૌથી યુવા રાષ્ટ્રીય અધ્યક્ષ, PM મોદીની હાજરીમાં થશે સત્તાવાર જાહેરાત

ભારતીય જનતા પાર્ટી (Bharatiya Janata Party) આવતીકાલે 20 જાન્યુઆરી, 2026 ના રોજ તેના નવા રાષ્ટ્રીય અધ્યક્ષ તરીકે નીતિન નવીન (Nitin Nabin) ના નામની સત્તાવાર જાહેરાત કરશે. વડાપ્રધાન નરેન્દ્ર મોદી (Narendra Modi), અમિત શાહ અને રાજનાથ સિંહની ઉપસ્થિતિમાં નવી દિલ્હી સ્થિત પાર્ટી હેડક્વાર્ટર ખાતે આ ઐતિહાસિક કાર્યક્રમ યોજાશે.

ભાજપના 12માં રાષ્ટ્રીય અધ્યક્ષ તરીકે નીતિન નવીન બિનહરીફ ચૂંટાયા

ભારતીય જનતા પાર્ટીમાં સંગઠન પર્વ (Sangathan Parv) ના અંતિમ તબક્કા હેઠળ નવા સુકાનીની પસંદગી પ્રક્રિયા પૂર્ણ થઈ છે. રાષ્ટ્રીય કાર્યકારી અધ્યક્ષ તરીકે સેવા આપી રહેલા નીતિન નવીન હવે ભાજપના 12 માં રાષ્ટ્રીય અધ્યક્ષ તરીકેની જવાબદારી સંભાળશે. માત્ર 45 વર્ષની વયે આ પદ સંભાળીને તેઓ ભાજપના ઇતિહાસમાં સૌથી યુવા રાષ્ટ્રીય અધ્યક્ષ બનવાનું બહુમાન મેળવશે.

PM મોદી અને અમિત શાહ બન્યા સમર્થક

આજે નોંધાયેલા કુલ 37 નામાંકન પત્રોમાં વડાપ્રધાન નરેન્દ્ર મોદી, ગૃહમંત્રી અમિત શાહ (Amit Shah) અને રક્ષામંત્રી રાજનાથ સિંહ (Rajnath Singh) પ્રસ્તાવક તરીકે જોડાયા હતા. રાષ્ટ્રીય રિટર્નિંગ ઓફિસર કે. લક્ષ્મણ એ જાહેરાત કરી હતી કે નિર્ધારિત સમય મર્યાદામાં માત્ર નીતિન નવીનનું એક જ નામ પ્રસ્તાવિત થયું હોવાથી તેઓ બિનહરીફ ચૂંટાયા છે. આવતીકાલે સવારે 11:30 થી 1:30 દરમિયાન તેમના નામની વિધિવત ઘોષણા કરવામાં આવશે.

નીતિન નવીન: બિહારના પાયાના કાર્યકરથી રાષ્ટ્રીય નેતૃત્વ સુધી

નીતિન નવીનનો રાજકીય પ્રવાસ સંઘર્ષ અને સમર્પણથી ભરેલો છે:

વારસો: તેઓ બિહારના વરિષ્ઠ નેતા સ્વ. નવીન કિશોર પ્રસાદ સિંહના પુત્ર છે.

રાજકીય શરૂઆત: વર્ષ 2006 માં પિતાના અવસાન બાદ પટના પશ્ચિમ બેઠક પરથી પેટાચૂંટણી જીતીને રાજકારણમાં પ્રવેશ કર્યો.

ધારાસભ્ય તરીકે: તેઓ 2010, 2015, 2020 અને તાજેતરમાં 2025 ની બિહાર વિધાનસભા ચૂંટણીમાં બાંકીપુર બેઠક પરથી સતત જીતતા આવ્યા છે.

મંત્રી પદ: બિહાર સરકારમાં તેમણે માર્ગ નિર્માણ, શહેરી વિકાસ અને કાયદા મંત્રી તરીકે મહત્વની જવાબદારીઓ નિભાવી છે.

વંશવાદ સામે આંતરિક લોકશાહીનો વિજય

ભાજપના વરિષ્ઠ નેતાઓ ગિરિરાજ સિંહ, મુખ્તાર અબ્બાસ નકવી અને બી.એસ. યેદિયુરપ્પા એ આ નિમણૂકને વધાવી લેતા જણાવ્યું કે ભાજપમાં જ એક સામાન્ય બૂથ સ્તરનો કાર્યકર ટોચના પદ પર પહોંચી શકે છે. કોંગ્રેસના વંશવાદ સામે ભાજપે ફરી એકવાર આંતરિક લોકશાહીનું ઉત્તમ ઉદાહરણ પૂરું પાડ્યું છે. નીતિન નવીન અને PM મોદીની જોડી આગામી સમયમાં ચૂંટણી મેદાનમાં 'ચોગ્ગા અને છગ્ગા' ફટકારશે તેવો વિશ્વાસ નેતાઓએ વ્યક્ત કર્યો છે.

આવતીકાલના શપથ ગ્રહણ પ્રસંગે ઉત્તર પ્રદેશના મુખ્યમંત્રી યોગી આદિત્યનાથ, રાજસ્થાનના ભજનલાલ શર્મા અને હરિયાણાના નાયબ સિંહ સૈની સહિત ભાજપ શાસિત રાજ્યોના તમામ મુખ્યમંત્રીઓ હાજર રહેશે.

Share On Social Media