ટ્રમ્પની ધમકી: ભારત પર 24 કલાકમાં ભારે ટેરિફ, રશિયા વેપારથી નારાજ

ટ્રમ્પે ભારત પર 24 કલાકમાં ટેરિફ વધારવાની ધમકી આપી. રશિયા સાથેના તેલ વેપારથી નારાજગી. ભારતે ધમકીને અનુચિત ગણાવી.

ટ્રમ્પની ધમકી: ભારત પર 24 કલાકમાં ભારે ટેરિફ, રશિયા વેપારથી નારાજ

અમેરિકી રાષ્ટ્રપતિ ડોનાલ્ડ ટ્રમ્પે ભારત પર ટેરિફ વધારવાની મોટી જાહેરાત કરી છે. એક ઇન્ટરવ્યૂમાં ટ્રમ્પે જણાવ્યું કે તેઓ આગામી 24 કલાકમાં ભારત પર ભારે ટેરિફ લગાવવા જઈ રહ્યા છે. તેમણે કહ્યું, "મને લાગે છે કે હું આગામી 24 કલાકમાં ભારતના ટેરિફમાં ભારે વધારો કરવા જઈ રહ્યો છું."

આ જાહેરાત પહેલાં ટ્રમ્પે સોમવારે જણાવ્યું હતું કે ભારત રશિયા પાસેથી મોટા પાયે તેલ ખરીદી રહ્યું છે અને તેને બજારમાં વેચીને નફો પણ કમાઈ રહ્યું છે. તેમણે તેમના સોશિયલ મીડિયા પ્લેટફોર્મ ટ્રૂથ પર લખ્યું હતું, "ભારત રશિયા પાસેથી મોટા પાયે તેલ ખરીદે છે અને તેનો મોટો હિસ્સો બજારમાં વેચીને ભારે નફો કમાઈ રહ્યું છે. ભારતને એ વાતની ચિંતા નથી કે રશિયાની યુદ્ધ મશીનરીથી યુક્રેનમાં કેટલા લોકો માર્યા જાય છે. તેથી, હું ભારત પર ટેરિફ વધારવા જઈ રહ્યો છું."

ભારતનો જવાબ

ટ્રમ્પની આ ધમકીને ભારતે "અનુચિત અને તર્કહીન" ગણાવી છે. ભારતના વિદેશ મંત્રાલયે એક નિવેદન જાહેર કરીને અમેરિકાની ટીકા કરી હતી. મંત્રાલયે જણાવ્યું કે અમેરિકા એક તરફ રશિયા સાથે વેપાર કરે છે અને બીજી તરફ ભારત-રશિયા વેપાર પર આંગળી ચીંધે છે. ગયા વર્ષે, કડક પ્રતિબંધો અને ટેરિફ હોવા છતાં, અમેરિકાએ રશિયા સાથે લગભગ 3.5 અબજ ડોલરનો વેપાર કર્યો હતો.

વિદેશ મંત્રાલયે અમેરિકાના આ બેવડા વલણ પર જણાવ્યું, "અમેરિકા હજુ પણ રશિયા પાસેથી પોતાની પરમાણુ ઉદ્યોગ માટે યુરેનિયમ હેક્સાફ્લોરાઇડ, ઇલેક્ટ્રિક વાહન ઉદ્યોગ માટે પેલેડિયમ, ખાતર અને રાસાયણિક ઉત્પાદનોની આયાત કરે છે."

મંત્રાલયે વધુમાં કહ્યું, "કોઈપણ મોટી અર્થવ્યવસ્થાની જેમ, ભારત પોતાના રાષ્ટ્રીય હિતો અને આર્થિક સુરક્ષાને સુરક્ષિત રાખવા માટે તમામ જરૂરી પગલાં લેશે."

રશિયન તેલનો મોટો ખરીદદાર ભારત

ભારત હાલમાં રશિયન તેલના સૌથી મોટા ખરીદદારોમાંનું એક છે. 2022માં રશિયા-યુક્રેન યુદ્ધ શરૂ થયા બાદ ઘણા યુરોપિયન દેશોએ રશિયા સાથેનો વેપાર ઘણો ઘટાડી દીધો હતો. રશિયન તેલ પર અમેરિકી અને યુરોપિયન દેશોના પ્રતિબંધો બાદ ભારત અને ચીન જેવા એશિયાઈ દેશોએ મોટા પાયે રશિયન તેલ ખરીદ્યું. ટૂંક સમયમાં રશિયા ભારતનો ટોચનો તેલ પુરવઠાકર્તા દેશ બની ગયો અને હજુ પણ ભારત રશિયા પાસેથી મોટા પાયે તેલ ખરીદે છે.

શરૂઆતના દબાણ બાદ અમેરિકા શાંત થઈ ગયું હતું, પરંતુ હવે ટ્રમ્પ વહીવટે ભારત પર ફરીથી દબાણ વધારવાનું શરૂ કર્યું છે. જોકે, ભારતે સ્પષ્ટ કર્યું છે કે તે કોઈ દબાણમાં નહીં આવે. આ દરમિયાન રશિયા પણ ભારતના બચાવમાં આવ્યું છે અને જણાવ્યું છે કે દરેક દેશને પોતાના વેપારી ભાગીદાર પસંદ કરવાનો હક છે, અમેરિકા દેશો પર દબાણ નથી કરી શકતું.

રશિયાનો જવાબ

રશિયન રાષ્ટ્રપતિ ભવન ક્રેમલિનના પ્રવક્તા દિમિત્રી પેસ્કોવે મંગળવારે મીડિયા સાથે વાત કરતાં જણાવ્યું, "અમે ઘણાં એવાં નિવેદનો સાંભળીએ છીએ જે સાચું કહીએ તો ધમકીઓ છે. આવી ધમકીઓ દેશોને રશિયા સાથે વેપાર સંબંધો ખતમ કરવા માટે મજબૂર કરવાનો પ્રયાસ છે. અમે આવા નિવેદનોને કાયદેસર માનતા નથી."

પેસ્કોવે વધુમાં કહ્યું, "અમારું માનવું છે કે સાર્વભૌમ દેશોને તેમના વેપારી ભાગીદારો, વેપાર અને આર્થિક સહયોગ માટે ભાગીદારો પસંદ કરવાનો અધિકાર હોવો જોઈએ અને છે પણ. દેશોને તેમના હિતમાં હોય તેવા વેપાર અને આર્થિક સહયોગ માટે ભાગીદારો પસંદ કરવાનો અધિકાર હોવો જોઈએ."

Share On Social Media