ફોક્સવેગન પેસેન્જર કાર્સ ઈન્ડિયાએ મંગળવારે જણાવ્યું હતું કે તે વધતા ઈનપુટ અને સામગ્રી ખર્ચની અસરને ઘટાડવા માટે 1 જાન્યુઆરી, 2024 થી તમામ કારના ભાવમાં વધારો કરી શકે છે.
ફોક્સવેગન પેસેન્જર કાર નવા વર્ષથી વાહનોના ભાવમાં 2 ટકા સુધીનો વધારો કરવાની યોજના ધરાવે છે. આ પહેલા પણ ઘણી કંપનીઓ કારને મોંઘી કરવાની જાહેરાત કરી ચૂકી છે.
ફોક્સવેગને જણાવ્યું હતું કે કંપની ઇનપુટ ખર્ચમાં થયેલા મોટા ભાગના વધારાને શોષી રહી છે, તેમ છતાં કેટલીક અસર ગ્રાહકોને આપવામાં આવશે. ફોક્સવેગન પેસેન્જર કાર્સ ઈન્ડિયા મધ્યમ કદની સેડાન વર્ટસથી લઈને પ્રીમિયમ એસયુવી ટિગુઆન સુધીના વાહનોનું વેચાણ કરે છે, જેની કિંમત રૂ. 11.48 લાખથી રૂ. 35.17 લાખની વચ્ચે છે.
મારુતિ સુઝુકી, હ્યુન્ડાઈ મોટર ઈન્ડિયા, ટાટા મોટર્સ, મહિન્દ્રા એન્ડ મહિન્દ્રા, હોન્ડા, ઓડી અને બીએમડબ્લ્યુએ પહેલાથી જ વાહનોના ભાવમાં વધારો કરવાની જાહેરાત કરી છે.
હકીકતમાં, કાર બનાવવા માટે વપરાતા કાચા માલના ભાવ વધી ગયા છે. આ કારણે કાર બનાવવાની કિંમત પણ વધી રહી છે અને કાર કંપનીઓને કિંમતમાં વધારો કરવો પડી રહ્યો છે.
