અમદાવાદ મેટ્રો રેલ પ્રોજેક્ટના ફેઝ 2A ને કેન્દ્રીય કેબિનેટ દ્વારા લીલી ઝંડી આપવામાં આવી છે. આ મહત્વપૂર્ણ નિર્ણયથી અમદાવાદ આંતરરાષ્ટ્રીય એરપોર્ટ હવે સીધું મેટ્રો કનેક્ટિવિટી સાથે જોડાશે, જે સ્થાનિક મુસાફરો તેમજ વિદેશથી આવતા પ્રવાસીઓ માટે મોટી સુવિધા બનશે.
આ નવો મેટ્રો કોરિડોર કોટેશ્વરથી શરૂ થઈને સીધો એરપોર્ટ સુધી પહોંચાડશે. આ 6 કિલોમીટર લાંબા રૂટ પર મુસાફરોની સુવિધા માટે પાંચ નવા સ્ટેશનોનું નિર્માણ કરવામાં આવશે. આ સ્ટેશનોમાં આશ્રમ રોડ, કોટેશ્વર પ્રાચીન મંદિર, સાબરમતી, સરદાર નગર અને એરપોર્ટનો સમાવેશ થાય છે.
આ પ્રોજેક્ટના આયોજનમાં ચાર એલિવેટેડ (જમીનથી ઉપર) સ્ટેશનો બનાવવામાં આવશે. જ્યારે, એરપોર્ટની સુરક્ષા અને ભૌગોલિક પરિસ્થિતિઓને ધ્યાનમાં રાખીને એક અંડરગ્રાઉન્ડ (જમીનની અંદર) સ્ટેશન તૈયાર કરાશે. અમદાવાદ એક્સપ્રેસના અહેવાલ મુજબ, આગામી ચાર વર્ષમાં આ ફેઝનું કામ સંપૂર્ણ રીતે પૂર્ણ થઈ જશે.
આ મહત્વાકાંક્ષી પ્રોજેક્ટ પૂર્ણ થતાંની સાથે જ અમદાવાદ અને ગાંધીનગર વચ્ચેનું મેટ્રો રેલ નેટવર્ક વિસ્તરીને કુલ 77.63 કિલોમીટરનું થઈ જશે. આ વિસ્તરણ શહેરના પરિવહન માળખાને મજબૂત બનાવશે અને મુસાફરીને વધુ સરળ બનાવશે.
