કોઈપણ પ્રકારનો નશો વ્યક્તિના જીવનને કેટલો વિનાશકારી બનાવી શકે છે, તેનું એક દુઃખદ ઉદાહરણ અમદાવાદમાં જોવા મળ્યું છે. હૈદરાબાદથી અમદાવાદ પોતાનું ભવિષ્ય ઘડવા અને પરિવારને મદદ કરવા આવેલી એક યુવતી નશાના રવાડે ચઢીને સંપૂર્ણપણે બરબાદ થઈ ગઈ હતી. બગીચામાં નિરાધાર હાલતમાં મળી આવેલી આ યુવતીને તંત્ર દ્વારા તેના પરિવાર સાથે ફરીથી ભેળવી દેવામાં આવી હતી.
અમદાવાદ શહેર અનેક લોકો માટે ઉજ્જવળ ભવિષ્યનું પ્રતીક રહ્યું છે, પરંતુ તેની બીજી બાજુએ કેટલાક લોકો વ્યસનોમાં ફસાઈને પોતાનું જીવન બરબાદ કરી દે છે. આવી જ એક 30 વર્ષીય યુવતી હૈદરાબાદથી સારા ભવિષ્યના સપના લઈને અમદાવાદ આવી હતી. પાલડી વિસ્તારમાં પીજીમાં રહેતી આ યુવતી ખરાબ સંગતમાં આવી જતાં નશીલા પદાર્થોના વ્યસનમાં સપડાઈ ગઈ હતી.
નશાની લતના કારણે ધીમે ધીમે આ યુવતીનું જીવન પતન તરફ ધકેલાવા લાગ્યું. તેણે પોતાની નોકરી ગુમાવી દીધી, બચાવેલા પૈસા પણ ખર્ચાઈ ગયા, અને પીજીનું ભાડું ચૂકવવા માટે પણ તેની પાસે પૈસા રહ્યા નહોતા. આ ઉપરાંત તેનો મોબાઈલ ફોન અને એક્ટિવા પણ ગુમ થઈ ગયા હતા. છેવટે, નિરાધાર બનેલી આ યુવતી મકરબા ફાટક નજીકના એક બગીચામાં રહેવા માટે મજબૂર બની હતી.
બે દિવસથી બગીચામાં રહી રહેલી આ યુવતીએ આખરે 112 હેલ્પલાઇનનો સંપર્ક કર્યો. અમદાવાદ એક્સપ્રેસના અહેવાલ મુજબ, પોલીસ, અભયમ્ હેલ્પલાઇન, સ્વૈચ્છિક સંસ્થાઓ અને મ્યુનિસિપલ તંત્રએ સંયુક્ત પ્રયાસો કરીને આ યુવતીને આશ્રય ગૃહમાં ખસેડી. ત્યારબાદ, તેના પરિવારનો સંપર્ક કરીને તેમને હૈદરાબાદથી અમદાવાદ બોલાવવામાં આવ્યા અને યુવતીનું તેના પરિવાર સાથે પુનઃમિલન કરાવવામાં આવ્યું.
