ઈમરાનની ધરપકડ પર ગુસ્સો ફાટી નીકળ્યો, રાવલપિંડીમાં આર્મી હેડક્વાર્ટરમાં ભીડ ઘૂસી ગઈ હતી.એટલું જ નહીં, આર્મીના કોર્પ્સ કમાન્ડરના ઘરમાં ઘૂસીને પણ લોકોએ તોડફોડ કરી અને આગ ચાંપી દીધી. ઈસ્લામાબાદમાં સ્થિતિ ખૂબ જ તંગ છે, લોકોએ મુખ્ય માર્ગને બ્લોક કરી દીધો છે અને તેથી સ્થિતિ વધુ ખરાબ થઈ રહી છે.
પાકિસ્તાનમાં ઈમરાન ખાનની ધરપકડ પર તેમના સમર્થકોનો ગુસ્સો ભડકી ગયો છે. લોકોએ ભારે હોબાળો મચાવ્યો હતો. તોડફોડ અને આગચંપીના અહેવાલો પણ છે. હદ ત્યારે થઈ ગઈ જ્યારે ટોળું રાવલપિંડીમાં આર્મી હેડક્વાર્ટરમાં ઘૂસી ગયું. એટલું જ નહીં, લોકોએ આર્મીના કોર્પ્સ કમાન્ડરના ઘરમાં તોડફોડ કરી હતી. ઈસ્લામાબાદમાં સ્થિતિ ખૂબ જ તંગ છે, લોકોએ મુખ્ય માર્ગને બ્લોક કરી દીધો છે અને પરિસ્થિતી વધારે ખરાબ થઈ રહી છે.
ઈમરાન ખાનની કોર્ટ પરિસરમાંથી ધરપકડ
અર્ધલશ્કરી દળો દ્વારા ઈમરાન ખાનની ધરપકડ બાદ તેમની પાર્ટી પાકિસ્તાન તહરીક-એ-ઈન્સાફ (PTI)ના કાર્યકરોએ ઈસ્લામાબાદમાં પ્રદર્શન કર્યું અને હંગામો મચાવ્યો. આ પછી પાકિસ્તાન પોલીસે શહેરમાં પ્રતિબંધિત આદેશો લગાવી દીધા હતા. ઈમરાન ખાન ભ્રષ્ટાચારના કેસમાં સુનાવણી માટે ઈસ્લામાબાદ હાઈકોર્ટમાં હાજર હતા ત્યારે અર્ધલશ્કરી દળોએ તેમની ધરપકડ કરી હતી.
એક દિવસ પહેલા ખાને દેશની સેના પર કથિત રીતે તેમની હત્યાનું કાવતરું ઘડવાનો આરોપ લગાવ્યો હતો. તે જ સમયે, સેનાએ આરોપ લગાવ્યો હતો કે ખાન ગુપ્તચર એજન્સી ISIના એક વરિષ્ઠ અધિકારી પર પાયાવિહોણા આરોપો લગાવી રહ્યા છે. પાર્ટીના વરિષ્ઠ નેતા શિરીન મજારીના જણાવ્યા અનુસાર, પીટીઆઈના વડા ખાન, જે લાહોરથી સંઘીય રાજધાની ઈસ્લામાબાદ પહોંચ્યા હતા, તેઓ કોર્ટમાં બાયોમેટ્રિક પ્રક્રિયામાંથી પસાર થઈ રહ્યા હતા ત્યારે અર્ધલશ્કરી દળના જવાનોએ કાચની બારી તોડી નાખી અને વકીલો અને ખાનના સુરક્ષા કર્મચારીઓને માર મારવાનું શરૂ કર્યું. બાદમાં તેની (ખાન) ધરપકડ કરવામાં આવી હતી.
ઈસ્લામાબાદમાં કલમ 144 લાગુ
મીડિયા અહેવાલો અનુસાર, ઇમરાન ખાનની ધરપકડ બાદ ઇસ્લામાબાદમાં કલમ 144 લાગુ કરવામાં આવી છે, કારણ કે તેમની પાર્ટીના કાર્યકરોએ શહેરભરમાં પ્રદર્શન કર્યું હતું અને રમખાણો જેવી સ્થિતિ સર્જી હતી. અહેવાલો અનુસાર પીટીઆઈના કાર્યકરોએ લાહોરમાં પણ રસ્તા રોક્યા અને પ્રદર્શન કર્યું.
