નેપાળમાં વધુ એક હવાઈ અકસ્માત થયો છે. રાજધાની કાઠમંડુની બહાર જંગલ વિસ્તારમાં હેલિકોપ્ટર ક્રેશ થયું હતું. આ અકસ્માતમાં 5 લોકોના મોત થયા હતા. સ્થાનિક અધિકારીઓએ હેલિકોપ્ટર દુર્ઘટનામાં પાંચ લોકોના મોતની પુષ્ટિ કરી છે. માનવામાં આવી રહ્યું છે કે વિમાનમાં ચીનના નાગરિકો સવાર હતા. ઘટનાની માહિતી મળતા જ નેપાળ પોલીસ ઘટનાસ્થળે હાજર થઈ ગઈ છે. પોલીસ ટીમે બચાવ કામગીરી શરૂ કરી દીધી છે.
કાઠમંડુમાં હેલિકોપ્ટર દુર્ઘટના બાદ એરપોર્ટના પ્રવક્તા સુભાષ ઝાએ જણાવ્યું હતું કે એર ડાયનેસ્ટીના 9N-AZD હેલિકોપ્ટરે કાઠમંડુથી રાસુવા માટે બપોરે 1:54 વાગ્યે ઉડાન ભરી હતી. હેલિકોપ્ટર નુવાકોટના શિવપુરી જિલ્લામાં પહોંચતા જ ક્રેશ થઈ ગયું.
પોલીસે એક નિવેદન જારી કરીને જણાવ્યું હતું કે હેલિકોપ્ટર ટેકઓફની ત્રણ મિનિટ પછી નિયંત્રણ સાથેનો સંપર્ક તૂટી ગયો હતો. મીડિયા અહેવાલો અનુસાર, હેલિકોપ્ટરે કાઠમંડુથી બપોરે 1:54 વાગ્યે ઉડાન ભરી હતી, પરંતુ ટેકઓફની ત્રણ મિનિટ પછી સંપર્ક તૂટી ગયો હતો. પોલીસે જણાવ્યું કે હેલિકોપ્ટર દુર્ઘટનામાં કુલ પાંચ લોકોના ઘટનાસ્થળે જ મોત થયા હતા. આ અકસ્માતમાં બે પુરૂષો, એક મહિલા અને પાયલટના મૃતદેહ મળી આવ્યા છે. સંપર્ક તૂટી ગયા બાદ હેલિકોપ્ટરમાં આગ લાગી હતી. આગના કારણે મૃતદેહો ખરાબ રીતે દાઝી ગયા છે. મૃતદેહોની ઓળખ થઈ રહી નથી.
