હાંગઝોઉમાં ચાલી રહેલી 19મી એશિયન ગેમ્સમાં મહિલા ક્રિકેટ સ્પર્ધા હવે છેલ્લા ચાર એટલે કે સેમિ-ફાઇનલ રાઉન્ડમાં પહોંચી ગઈ છે. શ્રીલંકાની મહિલા ટીમે થાઈલેન્ડને 8 વિકેટે હરાવીને સેમિફાઈનલમાં પ્રવેશ કર્યો હતો. જ્યારે બાંગ્લાદેશ અને હોંગકોંગ વચ્ચેની મેચ વરસાદના કારણે રમાઈ શકી ન હતી અને રેન્કિંગના આધારે બાંગ્લાદેશને સેમીફાઈનલની ટિકિટ મળી ગઈ હતી. આ પહેલા ટીમ ઈન્ડિયાની મલેશિયા સામેની ક્વાર્ટર ફાઈનલ મેચ વરસાદના કારણે પૂર્ણ થઈ શકી ન હતી. અહીં પણ રેન્કિંગના આધારે ભારતીય ટીમે સેમીફાઈનલમાં જગ્યા બનાવી લીધી હતી. સેમીફાઈનલમાં પહોંચનારી ચોથી ટીમ પાકિસ્તાન છે.
ટીમ ઈન્ડિયા સેમિફાઈનલમાં ક્યારે અને કોની સામે ટકરાશે?
ભારતીય મહિલા ક્રિકેટ ટીમ રવિવારે એશિયન ગેમ્સની સેમિફાઇનલમાં બાંગ્લાદેશ સામે ટકરાશે, જ્યારે બીજી સેમિફાઇનલ મેચ પાકિસ્તાન અને શ્રીલંકા વચ્ચે રમાશે. ગુરુવારે મલેશિયા સામેની મેચમાં ભારતીય ટીમે 15 ઓવરમાં બે વિકેટે 173 રન બનાવ્યા હતા. પરંતુ મલેશિયાની ઇનિંગ શરૂ થતાં જ વરસાદ પડ્યો જેના કારણે મેચ આગળ વધી શકી નહીં.
શુક્રવારે અહીં બાંગ્લાદેશ અને હોંગકોંગ વચ્ચેની ક્વાર્ટર ફાઈનલ મેચ પણ વરસાદને કારણે રદ કરવી પડી હતી. બહેતર ક્રમાંકિત ટીમ હોવાના કારણે બાંગ્લાદેશે સેમિફાઇનલમાં જગ્યા બનાવી હતી. અન્ય ક્વાર્ટર ફાઈનલ મેચમાં શ્રીલંકાએ થાઈલેન્ડને 25 બોલ બાકી રહેતા આઠ વિકેટે હરાવ્યું હતું.
મેન્સ ટીમ ક્યારે એક્શનમાં આવશે?
ભારતીય પુરુષ ટીમ પણ રુતુરાજ ગાયકવાડના નેતૃત્વમાં એશિયન ગેમ્સમાં પ્રવેશ કરશે. આ ગેમ્સમાં સારી રેન્કિંગના કારણે ટીમ ઈન્ડિયાને ક્વાર્ટર ફાઇનલમાં સીધી એન્ટ્રી મળી છે. મેન્સ ટુર્નામેન્ટની બંને સેમિફાઇનલ 6 ઓક્ટોબરે રમાશે. જ્યારે 7 ઓક્ટોબરે ટુર્નામેન્ટની ફાઈનલ એટલે કે ગોલ્ડ મેડલ મેચ અને ત્રીજા સ્થાન માટે બ્રોન્ઝ મેડલ મેચ યોજાશે.
