જમ્મુ. દક્ષિણ કાશ્મીરના કુલગામ જિલ્લાના સામનુ ગામમાં સુરક્ષાદળો અને આતંકવાદીઓ વચ્ચે એન્કાઉન્ટર શરૂ થયું છે. મળતી માહિતી મુજબ, આ એન્કાઉન્ટર બપોરે શરૂ થયું હતું. આ સાથે સુરક્ષા દળોએ આતંકીઓને ચારે બાજુથી ઘેરી લીધા છે અને બંને તરફથી સતત ભીષણ ગોળીબાર ચાલુ છે.
આ સાથે જ એલઓસી પાસે બારામુલ્લાના ઉરી સેક્ટરમાં એન્કાઉન્ટર થયું હતું, જેમાં સેનાએ બે આતંકીઓને ઠાર કર્યા છે. અધિકારીઓએ જણાવ્યું કે ગુરુવારે જમ્મુ-કાશ્મીરના કુલગામ જિલ્લામાં આતંકવાદીઓ અને સુરક્ષા દળો વચ્ચે અથડામણ થઈ હતી. આ વિસ્તારમાં આતંકવાદીઓની હાજરીની બાતમી મળ્યા બાદ સુરક્ષા દળોએ કુલગામના નેહામા ગામમાં ઘેરાબંધી અને સર્ચ ઓપરેશન શરૂ કર્યું હતું.
તેમણે કહ્યું કે સર્ચ ઓપરેશન ગોળીબારમાં ફેરવાઈ ગયું કારણ કે આતંકવાદીઓએ સુરક્ષાકર્મીઓ પર ગોળીબાર શરૂ કર્યો. અધિકારીઓએ જણાવ્યું કે હજુ સુધી કોઈ જાનહાનિના અહેવાલ પ્રાપ્ત થયા નથી અને વધુ માહિતીની રાહ જોવાઈ રહી છે.
