દિલ્હીની પટિયાલા હાઉસ કોર્ટે આજે હિઝબુલ મુજાહિદ્દીનના આતંકવાદી જાવેદ અહેમદ મટ્ટૂની 7 દિવસની કસ્ટડી દિલ્હી પોલીસના સ્પેશિયલ સેલને આપી છે. આપને જણાવી દઈએ કે ધરપકડ બાદ દિલ્હી પોલીસના સ્પેશિયલ સેલે હિઝબુલ મુજાહિદ્દીનના ઓપરેટિવ જાવેદ મટ્ટૂને પટિયાલા હાઉસ કોર્ટમાં રજૂ કર્યો હતો, ત્યારબાદ કોર્ટે તેને 7 દિવસની કસ્ટડી પોલીસને સોંપી દીધી છે. ગઈકાલે 4 જાન્યુઆરીએ દિલ્હી પોલીસે આતંકવાદી જાવેદ અહેમદ મટ્ટુની ધરપકડ કરી હતી.
10 લાખનું ઈનામ
સુરક્ષા એજન્સીઓએ આતંકવાદી મટ્ટુ પર 10 લાખ રૂપિયાનું ઈનામ જાહેર કર્યું હતું. તેનું નામ જમ્મુ-કાશ્મીરમાં આતંકવાદી હુમલાના ઘણા કેસોમાં સામેલ છે. આતંકવાદી મટ્ટૂ જમ્મુ-કાશ્મીરના સોપોરનો રહેવાસી છે. જાવેદ મટ્ટૂ 2009થી હિઝબુલ મજીદ્દીન સાથે સંકળાયેલો હતો. આ ઉપરાંત તેને સુરક્ષા એજન્સીઓની ટોપ 10 આતંકીઓની યાદીમાં પણ સામેલ કરવામાં આવ્યો હતો.
મટ્ટુ લાંબા સમયથી પાકિસ્તાનમાં રહેતો હતો. મટ્ટૂ જમ્મુ-કાશ્મીરમાં થયેલા 5 ગ્રેનેડ હુમલામાં પણ સામેલ હતો. આ ઉપરાંત મટ્ટુ અલગ-અલગ ઘટનાઓમાં 5 પોલીસકર્મીઓની હત્યામાં પણ સામેલ હતો.
A++ શ્રેણીનો આતંકવાદી
આતંકવાદીની ધરપકડ બાદ દિલ્હીના વિશેષ પોલીસ કમિશનર એચજીએસ ધાલીવાલે ગઈ કાલે કહ્યું હતું કે જાવેદ મટ્ટૂની દિલ્હી પોલીસના સ્પેશિયલ સેલ અને કેન્દ્રીય એજન્સીઓ સાથે સંકલન કરીને ધરપકડ કરવામાં આવી હતી. આતંકી પાસેથી એક પિસ્તોલ, મેગેઝિન અને ચોરેલી કાર મળી આવી છે. તમને જણાવી દઈએ કે આતંકવાદી મટ્ટુ જમ્મુ-કાશ્મીરનો A++ શ્રેણીનો આતંકવાદી છે.
