જમ્મુ-કાશ્મીરના ગાંદરબલ જિલ્લામાં એક ટેમ્પો ટ્રાવેલર લગભગ 60 ફૂટ ઊંડી ખીણમાં ખાબકતાં અમદાવાદ અને સુરતના પ્રવાસીઓ સહિત કુલ 18 લોકો ઘાયલ થયા છે. આ દુર્ઘટના મંગળવારે ગુન્ડ સુમ્બલ પાવર હાઉસ નજીક બની હતી, જેમાં આઠ લોકો ગંભીર રીતે ઘાયલ થયા હોવાના અહેવાલ છે.
આ ભયાનક અકસ્માત ગુન્ડ સુમ્બલ, કંગન વિસ્તારમાં બન્યો હતો જ્યારે વાહન સોનમર્ગથી શ્રીનગર તરફ જઈ રહ્યું હતું. પ્રાથમિક અહેવાલ મુજબ, વાહન રસ્તા પરથી કાબૂ ગુમાવીને ખીણમાં પડ્યું હતું. સ્થાનિક રહેવાસીઓ અને પોલીસ તાત્કાલિક ઘટનાસ્થળે પહોંચી ગયા હતા અને બચાવ કામગીરી શરૂ કરી હતી.
ઘાયલોને તાત્કાલિક તબીબી સહાય પૂરી પાડવા માટે સોનમર્ગ, ગુન્ડ અને ગનીવાન સહિતના સ્થળોએથી એમ્બ્યુલન્સ બોલાવવામાં આવી હતી. શરૂઆતમાં, ઇજાગ્રસ્તોને ગુન્ડની પ્રાઈમરી હેલ્થ સેન્ટર (PHC) ખાતે પ્રાથમિક સારવાર આપવામાં આવી હતી, જ્યાંથી તેમને વધુ સારવાર માટે શ્રીનગરની શેરે-કાશ્મીર ઇન્સ્ટિટ્યૂટ ઑફ મેડિકલ સાયન્સિસ (SKIMS) માં રિફર કરવામાં આવ્યા હતા.
કંગનના સબ-ડિવિઝનલ પોલીસ ઓફિસર (SDPO) રાજેશ રૈનાએ આ ઘટનાની પુષ્ટિ કરી છે કે ડ્રાઈવર સહિત 18 લોકો ઘાયલ થયા છે. તેમણે જણાવ્યું કે આઠ વ્યક્તિઓને ગંભીર ઈજાઓ પહોંચી છે અને તમામ ઘાયલોને SKIMS માં ખસેડવામાં આવ્યા છે. અમદાવાદ અને સુરતના પ્રવાસીઓ પણ આ દુર્ઘટનાનો ભોગ બન્યા છે, જેના કારણે ગુજરાતમાં ચિંતાનો માહોલ છે.
