જૂનાગઢ: મિઠાપુર ગામે NSS શિબિરનો પ્રારંભ, કુલપતિએ કહ્યું- 'સેવા અને રાષ્ટ્રભાવના જ શિબિરનું હાર્દ'

જૂનાગઢની જે.જે.સી.ઇ.ટી. કોલેજ દ્વારા મિઠાપુરમાં NSS શિબિર: યુવાશક્તિ ગ્રામોત્થાનના કાર્યમાં જોડાશે

જૂનાગઢ (નરેન્દ્ર દવે દ્વારા):જે.જે.સી.ઇ.ટી. કોમર્સ અને બીબીએ કોલેજ, જૂનાગઢ તથા ભક્તકવિ નરસિંહ મહેતા યુનિવર્સિટીના સંયુક્ત ઉપક્રમે રાષ્ટ્રીય સેવા યોજના (NSS) અંતર્ગત મેંદરડા તાલુકાના મિઠાપુર ગામે સાત દિવસીય ખાસ શિબિરનો પ્રારંભ થયો છે. યુનિવર્સિટીના કુલપતિ પ્રો.(ડો.) પ્રતાપસિંહજી ચૌહાણે દીપ પ્રાગટ્ય દ્વારા શિબિરને ખુલ્લી મૂકતા જણાવ્યું હતું કે, NSS એ માત્ર પ્રવૃત્તિ નથી પરંતુ વિદ્યાર્થીને સુસંસ્કૃત નાગરિક બનાવવાની પાઠશાળા છે. પર્યાવરણ રક્ષા, શ્રમ કાર્ય અને સામાજિક સેવા દ્વારા વિદ્યાર્થીઓમાં રાષ્ટ્રભાવના વિકસે તે જ આ શિબિરનો મુખ્ય ઉદ્દેશ્ય છે.

ગ્રામ્ય જાગૃતિ અને સેવાકીય પ્રવૃત્તિઓનો ધમધમાટ

સાત દિવસીય કેમ્પ દરમિયાન વિદ્યાર્થીઓ દ્વારા પ્રભાતફેરી, યોગાભ્યાસ, શેરી સફાઈ, શૈક્ષણિક જાગૃતિ અને ગ્રામ સંપર્ક જેવી વિવિધ પ્રવૃત્તિઓ કરવામાં આવશે. આ ઉપરાંત રાત્રિ દરમિયાન લોકજાગૃતિ નાટક, ભવાઈ, ડાયરો અને ભજન મંડળીના કાર્યક્રમો દ્વારા ગ્રામીણ જનતાને વ્યસનમુક્તિ અને સ્વચ્છતાનો સંદેશ આપવામાં આવશે. કોલેજના આચાર્ય ડો. એમ.પી. ત્રાડાએ નરસિંહ મહેતાના પદોનો ઉલ્લેખ કરી શિબિરના આધ્યાત્મિક અને નૈતિક મૂલ્યો પર ભાર મૂક્યો હતો.

આરોગ્ય અને પશુ નિદાન કેમ્પનું વિશેષ આયોજન

શિબિર દરમિયાન ગ્રામજનો માટે સેવાના યજ્ઞનું આયોજન કરવામાં આવ્યું છે, જેમાં જૂનાગઢના નામાંકિત તબીબો ડો. મુકેશ પાનસુરીયા, ડો. ધ્રુવિન વોરા અને ડો. નિલેષ મારકણા દ્વારા સર્વરોગ નિદાન કેમ્પ યોજાશે. એટલું જ નહીં, અબોલ પશુઓ માટે વેટેનરી ડોક્ટરો દ્વારા પશુરોગ સારવાર કેમ્પ પણ યોજવામાં આવશે. શિબિરાર્થીઓ દ્વારા 'બેટી બચાવો-બેટી પઢાવો', 'ફિટ ઈન્ડિયા મુવમેન્ટ' અને સાયબર ક્રાઈમ જાગૃતિ અંગેના વ્યાખ્યાનો પણ આપવામાં આવશે.

શિક્ષણ અને સંસ્કારનો સમન્વય: મહાનુભાવોની ઉપસ્થિતિ

આ પ્રસંગે બહાઉદ્દિન સાયન્સ કોલેજના આચાર્ય પ્રો. આર.પી. ભટ્ટ અને એક્ઝિક્યુટિવ કાઉન્સિલ મેમ્બર રાજુભાઈ વાડોદરીયાએ શિબિરને વિદ્યાર્થીઓના ઘડતર માટે અનિવાર્ય ગણાવી હતી. મિઠાપુરના સરપંચ બાલુભાઈ ત્રાડા અને લેઉવા પટેલ સમાજના પ્રમુખ જયેશભાઈ કુંભાણી સહિતના અગ્રણીઓએ વિદ્યાર્થીઓના આ સેવાકાર્યને બિરદાવ્યું હતું. વિશ્લેષકો માને છે કે, આવા ગ્રામીણ કેમ્પોથી યુવા પેઢી પ્રાચીન પરંપરાઓ અને ગ્રામીણ જીવનની વાસ્તવિકતાથી પરિચિત થાય છે.

રાષ્ટ્રનિર્માણમાં યુવાશક્તિનું અમૂલ્ય પ્રદાન

સમગ્ર કાર્યક્રમનું સંચાલન પ્રો. કૃષ્ણકાંત પટોળીયાએ કર્યું હતું અને આભારવિધિ પરાગ દેવાણીએ સંભાળી હતી. મિઠાપુર ગામે આયોજિત આ શિબિર શૈક્ષણિક, સામાજિક અને સાંસ્કૃતિક જાગૃતિનો નવો રાહ ચીંધશે. 'અમદાવાદ એક્સપ્રેસ' આ સુંદર આયોજન બદલ જે.જે.સી.ઇ.ટી. કોલેજ અને યુનિવર્સિટી પરિવારને અભિનંદન પાઠવે છે.