કર્ણાટકમાં ગણતરીના દિવસોમાં વિધાનસભાની ચૂંટણી યોજાવાની છે. રાજયમાં જેમ જેમ ચૂંટણી નજીક આવી રહી છે તેમ તેમ ભાજપના નેતાઓએ તેમનો પ્રવાસ તેમજ આવન જાવન વધારી દીધી છે. કેન્દ્રીય ગૃહમંત્રી અમિત શાહ કર્ણાટકના પ્રવાસે છે. અમિત શાહે આજે ચામુંડી હિલ્સ ખાતે પ્રસિદ્ધ ચામુંડેશ્વરી દેવીની મુલાકાત લીધી હતી અને પૂજા અર્ચના કરી હતી. શાહે કર્ણાટક અને સમગ્ર દેશના લોકોની સુખાકારી અને સમૃદ્ધિ માટે પણ પ્રાર્થના કરી હતી.
કેન્દ્રીય ગૃહમંત્રી શાહે ચામુંડેશ્વરી દેવીની પૂજા કરતા પહેલા ભગવાન ગણેશની પૂજા કરી હતી. આ દરમિયાન તેમની સાથે મૈસુર-કોડાગુના સાંસદ પ્રતાપ સિમ્હા અને ધારાસભ્ય એસએ રામદોસ પણ હતા.
મંદિરની કરી પરિક્રમા
પૂજા કર્યા બાદ શાહે મંદિરની પરિક્રમા પણ કરી હતી. અધિકારીઓએ જણાવ્યું હતું કે એક હજાર વર્ષથી વધુ જૂનું મંદિર શરૂઆતમાં એક નાનું મંદિર હતું અને મુખ્ય પૂજા સ્થળ બનતા પહેલા સદીઓથી તેનું મહત્વ હતું. તેમણે કહ્યું કે મૈસુરના મહારાજા સત્તામાં આવ્યા પછી તેનું મહત્વ વધી ગયું. તેઓ ચામુંડેશ્વરીના મહાન ભક્ત અને ઉપાસક હતા. તેણે ચામુંડેશ્વરી દેવીને પોતાની ગૃહદેવતા બનાવી.
10મીએ ચૂંટણી, 13મીએ મતગણતરી
જણાવી દઈએ કે કર્ણાટક વિધાનસભા ચૂંટણી માટે 10 મેના રોજ મતદાન થવાનું છે અને મતદાનના પરિણામ 13 મેના રોજ આવશે. કર્ણાટક વિધાનસભાનો કાર્યકાળ 24 મેના રોજ સમાપ્ત થઈ રહ્યો છે. રાજ્યમાં કુલ 224 વિધાનસભા બેઠકો છે.
