જમ્મુ-કાશ્મીરમાં ફરી એકવાર આતંકીઓએ જમ્મુના સુંજવાન આર્મી બેઝને નિશાન બનાવીને ત્રાટક્યું છે. હુમલા દરમિયાન એક જવાન ઘાયલ થયો હતો. કથિત રીતે આતંકવાદીઓએ બેઝની બહારથી ફાયરિંગ કરીને વિસ્તારમાં ઓચિંતો હુમલો કર્યો હતો. સૈનિકોના તાત્કાલિક જવાબી કાર્યવાહી છતાં હુમલાખોરો નાસી છૂટવામાં સફળ રહ્યા હતા. તેમને શોધવા માટે સર્ચ ઓપરેશન શરૂ કરવામાં આવ્યું છે.
આ ઘટના સોમવારે સવારે 11 વાગ્યાની આસપાસ બની હતી, આતંકવાદીઓએ લગભગ 200 મીટર દૂરથી કેમ્પ પર ગોળીબાર કર્યો હતો. એન્ટ્રી પોઈન્ટ પર તૈનાત એક સૈનિકને ગોળી વાગી હતી અને તેને હોસ્પિટલમાં દાખલ કરવામાં આવ્યો છે. માનવામાં આવે છે કે આ હુમલામાં 2-3 આતંકીઓ સામેલ હતા.
આ હુમલો પ્રદેશમાં આતંકવાદી પ્રવૃત્તિમાં તાજેતરના ઉછાળાનો એક ભાગ છે, જેમાં જૂન મહિનાથી સુરક્ષા દળો અને આતંકવાદીઓ વચ્ચે અનેક વખત એન્કાઉન્ટર થયા છે. ગુરુવારે, સુરક્ષા દળોએ કુપવાડા જિલ્લાના માછલ અને તંગધાર સેક્ટરમાં એલઓસીની નજીક ઘૂસણખોરીના પ્રયાસને નિષ્ફળ બનાવ્યો, જેમાં ત્રણ આતંકવાદીઓ માર્યા ગયા.
