અમદાવાદના પૂર્વ વિસ્તારમાં વસ્ત્રાલ પાસે એક ઓટોમાં કેટલાક યુવકો દિવસભર સ્ટંટ અને ગુંડાગીરી કરતા જોવા મળ્યા હતા. જેનો વીડિયો સોશિયલ મીડિયા પર વાયરલ થયા બાદ અમદાવાદ પોલીસે આ તમામ લોકો સામે કડક કાર્યવાહી હાથ ધરી છે.
આ તમામ લોકો બેદરકારીપૂર્વક રીક્ષા ચલાવી રહ્યા હતા અને પોતાના તેમજ અન્ય લોકોના જીવને જોખમમાં મુકી રહ્યા હતા. રિક્ષાચાલકના બે સાથીઓ પણ પાછળ લટકતા અને ખુલ્લેઆમ છરી બતાવતા જોવા મળ્યા હતા. તમામ યુવાનો પોલીસનો કોઈ ડર ન હોય તેમ નીડરતાથી બધું કરી રહ્યા હતા.
તેમણે ખુલ્લેઆમ છરી બતાવીને લોકોમાં ભયનો માહોલ ઉભો કર્યો હતો. તેનો આ વીડિયો સોશિયલ મીડિયા પર ઘણો વાયરલ થયો છે. જ્યારે પોલીસને આ વિશે જાણ થઈ, ત્યારે ટ્રાફિક પોલીસે કેસ નોંધ્યો અને થોડા કલાકોમાં ત્રણ આરોપીઓની ધરપકડ કરી.
વીડિયોમાં શું જોવા મળ્યું
વીડિયોમાં રિક્ષા ચાલક જોખમી રીતે ટ્રેક્ટર અને મિની ટેમ્પો વચ્ચે રિક્ષાને પુરપાટ ઝડપે ઓવરટેક કરી રહ્યો છે. રિક્ષાચાલક નજીકના ચાલકોના જીવ જોખમમાં હોય તે રીતે રિક્ષા હંકારી રહ્યો હતો. બાદમાં રિક્ષાની પાછળ બેઠેલા બે લોકો બહાર આવે છે અને છરી બતાવે છે. બંને વ્યક્તિઓ દ્વારા છરીના પ્રદર્શનથી લોકોમાં ભયનો માહોલ સર્જાયો હોવાનું પણ દેખાઈ રહ્યું છે. આ સમગ્ર ઘટનાનો વીડિયો પણ સોશિયલ મીડિયા પર વાયરલ થયો હતો. ઘટના અંગે પોલીસને પણ જાણ કરવામાં આવી હતી.
એકની ધરપકડ, બે જેલમાં ધકેલાયા
આઈ ડિવિઝન ટ્રાફિક-પોલીસે વીડિયોના આધારે ગુનો નોંધ્યો હતો. રિક્ષાના નંબરના આધારે પોલીસ રિક્ષા માલિક સુધી પહોંચી હતી. પોલીસે અમરાઈવાડીમાં રહેતા ઉદય ગોસ્વામી નામના 19 વર્ષીય રિક્ષાચાલકની ધરપકડ કરી હતી. આ સિવાય પોલીસને રિક્ષામાં બેઠેલા અન્ય બે લોકો પણ મળી આવતા તેઓને પણ જેલ હવાલે કરવામાં આવ્યા હતા. પોલીસે રિક્ષા પણ ભેગી કરી વધુ તપાસ હાથ ધરી છે. આ પહેલા પણ પોલીસે બેદરકારીથી વાહન ચલાવીને લોકોના જીવ જોખમમાં મૂકનારા અનેક લોકોની ધરપકડ કરી છે, પરંતુ તેમ છતાં કોઈને કાયદાનો ડર નથી અને આવા કિસ્સાઓ વધી રહ્યા છે.
