નવી દિલ્હી: વચગાળાના જામીન પર જેલમાંથી બહાર આવ્યા બાદ દિલ્હીના મુખ્યમંત્રી અરવિંદ કેજરીવાલ શનિવારે સૌથી પહેલા પોતાના પરિવાર અને પંજાબના મુખ્યમંત્રી ભગવંત માન સાથે કનોટ પ્લેસના પ્રાચીન હનુમાન મંદિર પહોંચ્યા હતા. તેમણે મંદિરમાં વિધિવત પ્રાર્થના કરી. આ દરમિયાન પંજાબના સીએમ ભગવંત માન, સાંસદ સંજય સિંહ, મંત્રીઓ આતિશી અને સૌરભ ભારદ્વાજ સહિત પાર્ટીના નેતાઓ અને મોટી સંખ્યામાં પાર્ટી સમર્થકો હાજર હતા.
આ પહેલા મંત્રી ગોપાલ રાય પણ હનુમાન મંદિર પહોંચ્યા હતા. મંદિરથી નીકળ્યા બાદ અરવિંદ કેજરીવાલ પાર્ટી કાર્યાલય પહોંચશે જ્યાં આમ આદમી પાર્ટીના નેતાઓ સાથે બેઠક યોજાશે અને ત્યારબાદ પ્રેસ કોન્ફરન્સનું પણ આયોજન કરવામાં આવશે.
દિલ્હીમાં રોડ શો કરશે
શુક્રવારે વચગાળાના જામીન પર તિહાડ જેલમાંથી બહાર આવતાની સાથે જ મુખ્યમંત્રીએ ભગવાન હનુમાનનો આભાર માન્યો અને 'સરમુખત્યારશાહી સામેની લડાઈ'માં લોકોનું સમર્થન માંગ્યું. કેજરીવાલ આજે બપોરે 1 વાગ્યે આમ આદમી પાર્ટી (AAP)ના કાર્યાલયમાં પ્રેસ કોન્ફરન્સને સંબોધિત કરશે અને દક્ષિણ દિલ્હી અને પૂર્વ દિલ્હી સંસદીય ક્ષેત્રોમાં બે રોડ શો કરશે.
દિલ્હીમાં 25મી મેના રોજ મતદાન છે
સુપ્રીમ કોર્ટે 1 જૂન સુધી વચગાળાના જામીન આપ્યા છે. કોર્ટે કેજરીવાલને 2 જૂને આત્મસમર્પણ કરવા કહ્યું છે. કેજરીવાલની જેલમાંથી મુક્તિ અસ્થાયી હોઈ શકે છે, પરંતુ તે દિલ્હીમાં AAPના લોકસભા અભિયાનને વેગ આપશે તેવી અપેક્ષા છે, જ્યાં 25 મેના રોજ મતદાન થવાનું છે. કોંગ્રેસ સાથે ગઠબંધન હેઠળ, AAP દિલ્હીની કુલ સાત લોકસભા બેઠકોમાંથી ચાર બેઠકો પર ચૂંટણી લડી રહી છે.
કેજરીવાલ 50 દિવસ બાદ શુક્રવારે જેલમાંથી બહાર આવ્યા હતા. EDએ તેની 21 માર્ચે ધરપકડ કરી હતી. જેલમાંથી બહાર આવતાની સાથે જ કેજરીવાલે આમ આદમી પાર્ટીના કાર્યકર્તાઓને સંબોધિત કરતા કહ્યું હતું કે, "હું મારી તમામ તાકાતથી તાનાશાહી સામે લડી રહ્યો છું, પરંતુ 140 કરોડ લોકોએ એકસાથે આવવું પડશે. આપણે સાથે મળીને તેની સામે લડવું પડશે. હું તમારી વચ્ચે છું, મેં તમને કહ્યું કે હું તમારી વચ્ચે છું.
