અમદાવાદ (જ્યોતિ પટેલ): અખંડ સ્વરૂપા, શિવ અર્ધાંગિની અને કરોડો ભક્તોના આસ્થાના કેન્દ્ર એવા કુળદેવી મા ઉમિયા માતાજીના પ્રાગટ્ય સ્થાન ઊંઝા ખાતે દીપાવલી પર્વનો ભવ્યાતિભવ્ય અને હર્ષોલ્લાસભર્યો શુભારંભ થયો છે. નૂતન વર્ષના આ પાવન અવસરે 10 લાખથી પણ વધુ શ્રદ્ધાળુઓ માતાજીના ચરણોમાં શીશ ઝુકાવી ધન્યતા અનુભવશે. દેશ-વિદેશથી આવતા આ લાખો દર્શનાર્થીઓને દર્શન, રહેવા, ભોજન પ્રસાદ અને પાર્કિંગની કોઈ અગવડ ન પડે તે માટે ઉમિયા માતાજી સંસ્થાનની વિવિધ કમિટીઓ દ્વારા અદભુત 'માઈક્રો પ્લાનિંગ' કરવામાં આવ્યું છે.
ભક્તિનો અવિરત પ્રવાહ: કારતક સુદ એકમથી પાંચમ સુધી ભક્તોનું ઘોડાપૂર
કડવા પાટીદાર સમાજના કુળદેવી હોવા ઉપરાંત સર્વ સમાજના શ્રદ્ધાળુઓ માટે ઊંઝા ધામ અતૂટ આસ્થાનું પ્રતીક છે. કારતક સુદ પૂનમથી ભાઈબીજ સુધી લાખો ભક્તોએ માતાજીના દર્શન કર્યા બાદ, હવે કારતક સુદ એકમથી લાભ પાંચમ દરમિયાન અંદાજે 10 લાખ જેટલા શ્રદ્ધાળુઓ મા ઉમિયાના આશીર્વાદ લેવા ઊંઝા પધારશે. સમગ્ર મંદિર પરિસર "જય ઉમિયા મા"ના નાદથી ગુંજી ઉઠ્યું છે.
દર્શનમાં કોઈ ધક્કામુક્કી નહીં: ખાસ વ્યવસ્થા અને સુગમ રૂટ
લાખોની ભીડ વચ્ચે પણ દરેક ભક્ત શાંતિથી માતાજીના દર્શન કરી શકે તે માટે સંસ્થાને વિશેષ વ્યવસ્થા ગોઠવી છે:
ખાસ દર્શન રૂટ: સિનિયર સિટીઝન, નાના બાળકો સાથે આવતી બહેનો અને દિવ્યાંગ શ્રદ્ધાળુઓ કોઈપણ જાતના વિઘ્ન કે ધક્કામુક્કી વગર સરળતાથી દર્શન કરી શકે તે માટે અલગ અને સુગમ રૂટ તૈયાર કરાયા છે.
35 કમિટીઓ ખડેપગે: સંસ્થાનની 35 જેટલી વિવિધ કમિટીના સમર્પિત ભાઈ-બહેનો અને યુવા સ્વયંસેવકોની ટીમ ખડેપગે સેવા આપી રહી છે.
શુદ્ધ, સાત્વિક અને પૌષ્ટિક ભોજન પ્રસાદની અવિરત સેવા
ઉમિયા માતાજી સંસ્થાન દ્વારા વર્ષના 365 દિવસ ભક્તો માટે નિઃશુલ્ક કે નજીવા દરે શુદ્ધ અને સાત્વિક ભોજન પ્રસાદની વ્યવસ્થા હોય છે. દીપાવલી પર્વના ભારે ધસારાને પહોંચી વળવા મંદિર સંકુલમાં આવેલી 'મા અન્નપૂર્ણા ભોજનશાળા', 'ઉમા પ્રસાદમ-1' અને 'ઉમા પ્રસાદમ-2' ખાતે વિશેષ આયોજન કરાયું છે, જેથી લાખો શ્રદ્ધાળુઓ કોઈપણ અગવડ વગર શાંતિપૂર્વક પ્રસાદ ગ્રહણ કરી શકે.
વિદેશથી આવતા ભક્તો માટે રહેવાની અકલ્પનીય સગવડ અને સુરક્ષિત પાર્કિંગ
ગુજરાત ઉપરાંત અન્ય રાજ્યો અને વિદેશમાંથી પણ ભક્તો માતાજીના દર્શને ઉમટી રહ્યા છે. તેમના ઉતારા માટે વિશ્રાંતિગૃહ, માનસરોવર વિશ્રાંતિગૃહ, ઉમા ભવન અને ઉમા યાત્રી ભવન ખાતે ઉત્તમ વ્યવસ્થા કરવામાં આવી છે. ઉપરાંત, મંદિર નજીક વિશાળ પાર્કિંગ પ્લોટ તૈયાર કરાયા છે, જ્યાં સંસ્થાનના યુવા સ્વયંસેવકો અને સિક્યુરિટી ગાર્ડ દ્વારા વાહનોનું સુરક્ષિત પાર્કિંગ કરાવવામાં આવી રહ્યું છે.
માતાજીની 'દિવ્ય સાડી'નો અલૌકિક મહિમા
મા ઉમિયાને અર્પણ કરવામાં આવતી સાડીમાં અલૌકિક શક્તિ અને સકારાત્મક ઊર્જા હોવાની ભક્તોમાં અતૂટ શ્રદ્ધા છે. આ દિવ્ય સાડી ખરીદવા માટે ભક્તોમાં ભારે ઉત્સાહ જોવા મળે છે. લોકવાયકા અને શ્રદ્ધા મુજબ, આ સાડીને ઘરની તિજોરી કે પૂજાઘરમાં રાખવાથી વાસ્તુદોષ અને નકારાત્મક ઊર્જા દૂર થાય છે તથા ઘરમાં સુખ-સમૃદ્ધિનો વાસ થાય છે.
નવા વર્ષે વેપાર-ધંધાના શુભારંભની શુકનવંતી પરંપરા
અસંખ્ય ઉદ્યોગસાહસિકો અને વેપારીઓનો વર્ષો જૂનો અતૂટ નિયમ છે કે નૂતન વર્ષે મા ઉમિયાના ચરણોમાં શીશ ઝુકાવી આશીર્વાદ લીધા બાદ જ તેઓ પોતાના નવા વ્યવસાય, ધંધા કે નોકરીના શ્રીગણેશ કરે છે. બેસતા વર્ષથી લાભ પાંચમ સુધી માતાજીના આશીર્વાદ લઈને શરૂ કરેલું કાર્ય આખું વર્ષ અકલ્પનીય પ્રગતિ અને સફળતા અપાવે છે તેવી દ્રઢ માન્યતા છે.
ઓર્ગેનિક કુમકુમ અને ચાંદીના સિક્કાની ખરીદી માટે ભક્તોની ભીડ
મંદિર સંકુલમાં શ્રદ્ધાળુઓ માટે વિવિધ સ્ટોલ ઊભા કરવામાં આવ્યા છે, જ્યાં સંસ્થાનનું સાહિત્ય, માતાજીની છબી, મૂર્તિ, ચાંદીના સિક્કા અને નયનરમ્ય કેલેન્ડર ઉપલબ્ધ છે. ખાસ કરીને કેમિકલ મુક્ત 'ઓર્ગેનિક કુમકુમ', માતાજીની સાડી અને ચાંદીના સિક્કા નવા વર્ષમાં ખરીદવા અત્યંત શુકનવંતા ગણાતા હોવાથી આ સ્ટોલ પર ભક્તોની ભારે ભીડ જોવા મળી રહી છે.
પદયાત્રીઓ અને સંઘોનું ભવ્ય સ્વાગત
મા ઉમિયા પ્રત્યે અપાર શ્રદ્ધા ધરાવતા ભક્તો માતાજીનો દિવ્ય રથ લઈને પદયાત્રા કરતા ઊંઝા પહોંચી રહ્યા છે. પદયાત્રીઓ અને સંઘોની વધતી સંખ્યાને ધ્યાનમાં રાખીને તેમના માટે રહેવા તથા જમવાની વિશેષ સુવિધાઓ ઊભી કરવામાં આવી છે.
"એકપણ યાત્રિકને કોઈ તકલીફ ન પડે તેવું માઈક્રો પ્લાનિંગ કર્યું છે"
ઉમિયા માતાજી સંસ્થાનના પ્રમુખ અને પૂર્વ IAS અધિકારી શ્રી એમ. એસ. પટેલ (મહેન્દ્ર પટેલ) જણાવે છે કે, "સંસ્થાનની વિવિધ કમિટીના સમર્પિત ભાઈ-બહેનોની ટીમ સેવા કાર્ય માટે સંપૂર્ણ કટિબદ્ધ છે. એકપણ દર્શનાર્થીને કોઈ તકલીફ ન પડે તે માટે સચોટ માઈક્રો પ્લાનિંગ કરાયું છે. દરેક શ્રદ્ધાળુ પર મા ઉમિયાની સદૈવ કૃપા વરસતી રહે અને સૌની શુભ મનોકામનાઓ માતાજી પૂર્ણ કરે તેવી પ્રાર્થના."
આ પાવન અવસરે સંસ્થાનના ઉપપ્રમુખ, માનદમંત્રી, ટ્રસ્ટીશ્રીઓ અને તમામ પદાધિકારીઓ દ્વારા સમસ્ત ભક્તજનોને નૂતન વર્ષની હાર્દિક શુભકામનાઓ પાઠવવામાં આવી છે.
