ગુજરાત પોલીસે પોતાની પરંપરાને જાળવી રાખતા ગાંધીનગર સ્થિત પોલીસ ભવન ખાતે 'સેલ્યુટ અવર મેન્ટર્સ' કાર્યક્રમનું ભવ્ય આયોજન કર્યું હતું. રાજ્યના પૂર્વ પોલીસ વડા શ્રી વિકાસ સહાય દ્વારા બે વર્ષ પહેલા શરૂ કરવામાં આવેલી આ અનોખી પહેલ અંતર્ગત પોતાના કર્મયોગથી ગુજરાત પોલીસના સુવર્ણ ઇતિહાસની પાયાની ઈંટો મૂકી છે અને ખાખી વર્દીની ગરિમાને વૈશ્વિક સ્તરે ઉજ્જ્વળ બનાવી છે, તેવા નિવૃત્ત DGP અને ADGP રેન્કના અધિકારીઓનું ગૌરવભેર સન્માન કરવામાં આવ્યું હતું.
જે પોલીસ અધિકારીશ્રીઓએ પોતાનુ સંપૂર્ણ જીવન ગુજરાત પોલીસ સેવામાં સમર્પિત કરી ગુજરાત પોલીસનો સુવર્ણ ઇતિહાસ ઘડ્યો છે તેમજ અનેક નવીન પરિવર્તનો લાવીને ગુજરાત પોલીસના ગૌરવમાં વધારો કર્યો છે, તેવા નિવૃત્ત ડીજીપી અને એડીજીપી સહિતની રેન્કના પોલીસ અધિકારીશ્રીઓને એક મંચ પર એકત્રિત કરી તમામ અધિકારીશ્રીઓનું આજે આદરપૂર્વક સન્માન કરવામાં આવ્યું હતું. ડીજીપી અને એડીજીપી જેવા ઉચ્ચ પદ પરથી નિવૃત્ત થયેલા ૩૦થી વધુ અધિકારીશ્રીઓ અને તેમના પરિવારો આ સન્માન સમારોહમાં ઉપસ્થિત રહ્યા હતા.
ગાંધીનગર પોલીસ ભવન ખાતે આયોજિત 'વી સેલ્યુટ અવર મેન્ટોર્સ' (We Salute Our Mentors) કાર્યક્રમમાં ગુરુ તેવા સૌ નિવૃત્ત સિનિયર અધિકારીશ્રીઓને સંબોધતા રાજ્યના પોલીસ વડા શ્રી જ્ઞાનેન્દ્રસિંહ મલિકે જણાવ્યું હતું કે, વરિષ્ઠ માર્ગદર્શકોને વંદન અને તેમના સન્માનના ઉદ્દેશ્ય સાથે આ અનોખા કાર્યક્રમની શરૂઆત શ્રી વિકાસ સહાય દ્વારા કરવામાં આવી હતી. કોઈપણ પોલીસ અધિકારીની સમગ્ર કારકિર્દીમાં પ્રોબેશન અને તાલીમનો ગાળો પાયારૂપ હોય છે; તે સમયે મેન્ટર્સ પાસેથી મળેલી શીખ અને સંસ્કારો જ અધિકારીની આગળની તમામ સફળતાનું ચાલકબળ બને છે.
સાબરકાંઠાના હિંમતનગર ખાતેના પોતાના પ્રોબેશન સમયગાળાનો ઉલ્લેખ કરતા શ્રી મલિકે વરિષ્ઠ અધિકારી શ્રી પ્રિયદર્શી અને શ્રી પી. બી. ગોંડિયાના યોગદાનને વિશેષ રૂપે બિરદાવ્યું હતું. તેમણે જણાવ્યું કે ફિલ્ડ તાલીમ દરમિયાન નિયમિત અંગ્રેજીમાં વીકલી ડાયરી લખવાનો આગ્રહ, રાત્રિ રાઉન્ડ, ગેરહાજર કર્મચારીઓના જાતે નિવેદનો લેવા તેમજ લોકફરિયાદોનું સંવેદનશીલ નિવારણ કરવા જેવી પદ્ધતિઓ તેમને આ મેન્ટોર્સ પાસેથી શીખવા મળી હતી.
આ ઉપરાંત, જૂનાગઢ ખાતે ટ્યુનિક યુનિફોર્મ અને તત્કાલીન આઈજી શ્રી ગુરદયાલ સિંહની ઇન્સ્પેક્શન પરેડથી શિસ્ત અને લાઇન તપાસનું મહત્વ સમજાયું હતું, જ્યારે પ્રાંતિજ ખાતે એએસપી તરીકે પોલીસ સ્ટેશન સંચાલન અને પંચાયત ચૂંટણી દરમિયાન ચૂંટણી વ્યવસ્થાપનની મહત્વપૂર્ણ તાલીમ મળી હતી. બાદમાં પોરબંદર ખાતે શ્રી પ્રિયદર્શી સરના ઇન્સ્પેક્શન વખતે ક્ષતિરહિત પરેડ આપીને તેમની પ્રશંસા મેળવ્યાની યાદ પણ તેમણે તાજી કરી હતી.
પોતાના સંબોધનના અંતે શ્રી મલિકે પૂર્વ પોલીસ કમિશનર શ્રી સંજય શ્રીવાસ્તવ સહિત ઉપસ્થિત તમામ વરિષ્ઠ નિવૃત્ત અધિકારીઓ પ્રત્યે કૃતજ્ઞતા વ્યક્ત કરી હતી. તેમણે ઉમેર્યું કે કરિયરના પ્રારંભે આદરણીય માર્ગદર્શકો પાસેથી મળેલું વ્યવહારુ જ્ઞાન, કાર્યપદ્ધતિ અને શિસ્ત આજે કારકિર્દીના અંતિમ તબક્કે પણ એટલાં જ માર્ગદર્શક અને ઉપયોગી સાબિત થઈ રહ્યાં છે. ગુજરાત પોલીસ હંમેશાં પોતાના મેન્ટોર્સના અમૂલ્ય માર્ગદર્શન અને વારસાનું ઋણી રહેશે.
આ સમારોહમાં અમદાવાદ શહેર પોલીસ કમિશનર શ્રી અનુપમસિંહ ગહેલોતે જણાવ્યું કે, પોલીસના સર્વિસ રેકોર્ડમાં પોસ્ટિંગ અને પ્રમોશન જેવી બાબતો નોંધાય છે, પરંતુ તેઓ રાત્રે મોડા ઘરે પહોંચે છે, બાળકો જાગે તે પહેલાં ફરી ફરજ પર પહોંચી જાય છે, તહેવારોમાં રસ્તા પર ઊભા રહીને પ્રજાની સુરક્ષા કરે છે કે સામાજિક પ્રસંગો છોડવા પડે છે—આ ત્યાગ અને સંઘર્ષ ક્યારેય રેકોર્ડમાં નથી લખાતો. ત્યારે પોલીસ અધિકારીઓની સતત થતી બદલીઓ અને પડકારો વચ્ચે તેમના પરિવારજનો અને પત્નીએ જે સાથ આપ્યો, ઘર સંભાળ્યું અને ત્યાગ કર્યો, તેની તેમણે ખાસ પ્રશંસા કરી હતી.
તેમણે ઉમેર્યું કે પોલીસ વ્યવસ્થા કાયદા-કાનૂન કે પ્રક્રિયાઓની સાથે સાથે વરિષ્ઠ અધિકારીઓના અનુભવો, પરંપરા અને શિસ્ત દ્વારા ચાલે છે. સાથે જ તેમણે જણાવ્યું કે વરિષ્ઠ અધિકારીઓએ વિવિધ કટોકટી, કાયદો-વ્યવસ્થા કે બંદોબસ્ત દરમિયાન જે નિર્ણયો લીધા અને શીખ આપી, તે અનુભવો આજે પણ નવી પેઢીના અધિકારીઓ સાથે શેર કરવામાં આવે છે અને સમગ્ર ગુજરાત પોલીસ હંમેશાં પોતાના મેન્ટોર્સની ઋણી રહેશે.
નિવૃત્ત ડીજીપી શ્રી પી. સી. પાંડે, શ્રી એસ.એસ.ખાંડવાવાલા, શ્રી સતિષ શર્મા, શ્રી મીરા રામનિવાસ, નિવૃત્ત એડીજીપી શ્રી આર. પી. પ્રિયદર્શી, શ્રી વિજયસિંહ ગુમાન, શ્રી જે. એસ. બિન્દ્રા સહિતના નિવૃત્ત અધિકારીશ્રીઓએ આ પ્રકારના વિશેષ કાર્યક્રમના આયોજનની પ્રશંસા કરી અને પોતાના અનુભવો વ્યક્ત કર્યા હતા. તેમણે જણાવ્યું કે આ પ્રકારનું આયોજન કદાચ એકમાત્ર ગુજરાત રાજ્યમાં થતું હશે અને તે ખરેખર પ્રશંસનીય છે.
આ કાર્યક્રમમાં નિવૃત ઉચ્ચ પોલીસ અધિકારીશ્રીઓ શ્રી પી. સી.પાન્ડે, શ્રી એસ.એસ. ખંડાવાલા, શ્રી પ્રમોદ કુમાર, શ્રી આશિષ ભાટિયા, શ્રી શિવાનંદ ઝા અને શ્રી વિકાસ સહાય સહિત અનેક નિવૃત્ત પોલીસ અધિકારીશ્રીઓ ઉપરાંત વર્તમાનમાં ફરજરત ઉચ્ચ પોલીસ અધિકારીશ્રીઓ ઉપસ્થિત રહ્યા હતા.
