દેશના યશસ્વી કેન્દ્રીય ગૃહમંત્રી અને ગાંધીનગર લોકસભા મતવિસ્તારના લોકપ્રિય સાંસદ શ્રી અમિત શાહના 62મા જન્મદિવસની ઉજવણી શ્રદ્ધા, ભક્તિ અને રાષ્ટ્રભાવનાના ત્રિવેણી સંગમ સમાન બની રહી. અમદાવાદના ગોતા વિસ્તારમાં આવેલા વડવાળા જોગણી માતાજીના મંદિર ખાતે વૈદિક પરંપરાઓ અને ધાર્મિક વિધિઓ સાથે યોજાયેલા આ ભવ્ય મહોત્સવે સૌનું ધ્યાન ખેંચ્યું હતું.
હનુમાન ચાલીસાના સંગીતમય પાઠ અને હોમત્મક યજ્ઞની દિવ્ય આહુતિઓ
પ્રતિવર્ષની જેમ આ વર્ષે પણ ગોતા વોર્ડના AMC કોર્પોરેટર શ્રી કેતન પટેલ અને તેમની સમર્પિત ટીમ દ્વારા કેન્દ્રીય ગૃહમંત્રીના જન્મદિવસ નિમિત્તે અદભુત આયોજન કરવામાં આવ્યું હતું. સતાધાર ચાર રસ્તા પાસે આવેલા વડવાળા જોગણી માતાજીના પાવન આંગણે યોજાયેલા આ કાર્યક્રમમાં હજારોની સંખ્યામાં પ્રશંસકો, કાર્યકરો અને ભાઈ-બહેનોએ પ્રચંડ આસ્થા સાથે ભાગ લીધો હતો.
જન્મદિવસની શરૂઆત શાસ્ત્રોક્ત વિધિ મુજબ હોમત્મક યજ્ઞ અને સંગીતમય હનુમાન ચાલીસાના પાઠ સાથે થઈ હતી. યજ્ઞશાળામાં ગુંજતા વૈદિક મંત્રોચ્ચાર અને હનુમાન ચાલીસાના પાઠથી સમગ્ર વાતાવરણ ભક્તિમય બની ગયું હતું. યજ્ઞની પૂર્ણાહુતિ બાદ યોજાયેલી ભવ્ય સમૂહ આરતીમાં ઉપસ્થિત તમામ લોકોએ દેશના લોખંડી પુરુષ સમાન નેતાના ઉત્તરોત્તર પ્રગતિ અને દીર્ધાયુષ્ય માટે હૃદયપૂર્વક પ્રાર્થના કરી હતી.
અગ્રણીઓની ઉપસ્થિતિ અને જનજનાની શુભકામનાઓ
આ ભવ્ય ઉત્સવમાં કડવા પાટીદાર સમાજના સૌથી નાની ઉંમરના દાનેશ્વરી દાતા અને ઊંઝા ઉમિયાધામ મંદિરના ઉપ-પ્રમુખ શ્રી કિરીટ પટેલ (દેવગઢ), ભાજપના ઘાટલોડિયા વોર્ડ પ્રમુખ શ્રી ધ્રુમિલ પટેલ તેમજ મોટી સંખ્યામાં ભાજપના આગેવાનો, કાર્યકર્તાઓ અને શુભેચ્છકો ઉપસ્થિત રહ્યા હતા. સૌએ એકસૂરે પ્રાર્થના કરી હતી કે, "માતૃભૂમિની સેવા માટે પોતાનું જીવન અર્પણ કરનાર અમિત શાહ પર હનુમાન દાદાની અસીમ કૃપા સદાય બની રહે અને દેશની સુરક્ષા તથા વિકાસની ધુરા તેઓ લાંબો સમય સુધી સંભાળતા રહે."
દેશના યશસ્વી નેતાના જન્મદિવસે પ્રજાના ઉત્સાહ અને અખૂટ પ્રેમએ સાબિત કરી દીધું કે જનતાના હૃદયમાં સ્થાન પામેલા નેતા પ્રત્યેનો સ્નેહ સમય સાથે વધુ ગાઢ બનતો જાય છે.
