પશ્ચિમ રેલવેના વડોદરા મંડળના આરોગ્ય વિભાગ દ્વારા રાષ્ટ્રીય પલ્સ પોલિયો અભિયાન અંતર્ગત વિદ્યા મંદિર, પ્રતાપનગર રેલવે કોલોની ખાતે પલ્સ પોલિયો રસીકરણ શિબિરનું સફળ આયોજન કરવામાં આવ્યું. આ અભિયાનનો મુખ્ય ઉદ્દેશ પાંચ વર્ષથી ઓછી વયના તમામ બાળકોને પોલિયોથી સુરક્ષિત રાખવા માટે તેમને ઓરલ પોલિયો વેક્સિન (ઓપીવી)ના બે ટીપાં પીવડાવવાનો હતો.
વડોદરા મંડળના જનસંપર્ક અધિકારી શ્રી અનુભવ સક્સેનાએ જાહેર કરેલી પ્રેસ વિજ્ઞપ્તિ અનુસાર આ શિબિરમાં રેલવેના અધિકારીઓ, કર્મચારીઓ તથા તેમના પરિવારજનોએ ઉત્સાહભેર ભાગ લીધો અને પોતાના પાંચ વર્ષથી ઓછી વયના બાળકોને પોલિયો રસીના ટીપાં પીવડાવ્યા. આરોગ્ય એકમના તબીબો તથા પેરામેડિકલ સ્ટાફ દ્વારા બાળકોનું રસીકરણ કરવામાં આવ્યું તેમજ વાલીઓને પોલિયો નિર્મૂલન અંગે જરૂરી માર્ગદર્શન અને જાગૃતિ આપવામાં આવી.
અભિયાન દરમિયાન વાલીઓને માહિતગાર કરવામાં આવ્યા કે ભારત પોલિયો મુક્ત દેશ હોવા છતાં પડોશી દેશ પાકિસ્તાનમાં વાઇલ્ડ પોલિયો વાયરસ હજુ પણ સક્રિય છે. આંતરરાષ્ટ્રીય અવરજવરના કારણે આ વાયરસના પુનઃપ્રસારની સંભાવના રહેલી છે. તેથી રાષ્ટ્રીય પલ્સ પોલિયો અભિયાન દરમિયાન પાંચ વર્ષથી ઓછી વયના દરેક બાળકને, અગાઉ પોલિયોની રસી અપાઈ હોય તો પણ, ઓરલ પોલિયો વેક્સિનના બે ટીપાં અવશ્ય પીવડાવવા જરૂરી છે. આથી બાળકોની રોગપ્રતિકારક શક્તિ વધુ મજબૂત બને છે અને દેશને પોલિયો મુક્ત જાળવી રાખવાના પ્રયાસોને વધુ બળ મળે છે.
વડોદરા મંડળનો આરોગ્ય વિભાગ બાળકોના સર્વાંગી સ્વાસ્થ્ય અને સુરક્ષિત ભવિષ્ય માટે આવા જનહિતલક્ષી આરોગ્ય અભિયાનોનું અસરકારક આયોજન કરવા માટે સતત પ્રતિબદ્ધ છે.
