અમદાવાદના સરખેજ વિસ્તારમાં એક હૃદયદ્રાવક ઘટના સામે આવી છે, જ્યાં લગ્નના માત્ર ત્રણ મહિનાના ટૂંકા ગાળામાં જ એક પતિએ પોતાની પત્નીની નિર્મમ હત્યા કરી નાખી. આ ઘટનાથી સમગ્ર વિસ્તારમાં શોક અને ભયનો માહોલ છવાઈ ગયો હતો. ahmedabadexpress દ્વારા પ્રાપ્ત માહિતી અનુસાર, પતિએ રાત્રે પત્ની ગાઢ નિંદ્રામાં હતી ત્યારે તેના ગળા પર છરીના જીવલેણ ઘા ઝીંકી દીધા હતા.
આ ક્રૂર કૃત્ય કર્યા બાદ આરોપી પતિ મકાનના ધાબા પરથી કૂદીને નાસી છૂટ્યો હતો. આ ઘટનાની જાણ થતાં જ સરખેજ પોલીસે તાત્કાલિક ગુનો નોંધીને વધુ તપાસ હાથ ધરી હતી અને ગણતરીના સમયમાં આરોપીને ઝડપી પાડ્યો હતો.
મૂળ રાજસ્થાનના બાંસવાડા જિલ્લાના સુરવન ગામના વતની પપ્પુ પારગીની દીકરી રાસીતાના લગ્ન મેહુલ મુનિયા સાથે થયા હતા. આ નવદંપતી રોજગારીની શોધમાં મેહુલના પિતા લાલચંદ સાથે અમદાવાદમાં રહેવા આવ્યું હતું. ગત રાત્રે જ્યારે પપ્પુ પારગી પોતાના વતન રાજસ્થાનમાં હતા, ત્યારે તેમના વેવાઈ લાલચંદે તેમને ફોન કરીને આઘાતજનક સમાચાર આપ્યા કે રાસીતાને ગળામાં છરી વાગી છે અને તેને ગંભીર હાલતમાં સિવિલ હોસ્પિટલમાં દાખલ કરવામાં આવી છે. આ સમાચાર મળતા જ રાસીતાનો પરિવાર તાત્કાલિક અમદાવાદ દોડી આવ્યો હતો.
લાલચંદ, રાસીતા અને મેહુલ સરખેજમાં એક મકાનના ધાબા પર સૂતા હતા. વહેલી સવારે રાસીતાની હૃદયદ્રાવક ચીસો સાંભળીને લાલચંદ જાગી ગયા. તેમણે જોયું કે રાસીતા લોહીલુહાણ હાલતમાં તરફડી રહી હતી અને તેમનો જ પુત્ર મેહુલ ધાબા પરથી કૂદીને ભાગી રહ્યો હતો. ઇજાગ્રસ્ત રાસીતાને તાત્કાલિક સારવાર અર્થે ખસેડવામાં આવી, પરંતુ ગળાના ભાગે ઊંડો ઘા અને વધુ પડતા રક્તસ્ત્રાવને કારણે તેનું કરુણ મોત નીપજ્યું હતું.
સરખેજ પોલીસે મૃતકના પિતા પપ્પુ પારગીની ફરિયાદના આધારે હત્યાનો ગુનો નોંધીને ફરાર હત્યારા પતિ મેહુલને ઝડપી પાડ્યો છે. પોલીસે આ મામલે વધુ તપાસ શરૂ કરી છે અને ઘટના પાછળનું સાચું કારણ જાણવાનો પ્રયાસ કરી રહી છે.
