ગુરુવારે એશિયાના સૌથી ધનિક વ્યક્તિ મુકેશ અંબાણીની સંપત્તિમાં જબરદસ્ત ઉછાળો આવ્યો હતો. આ કારણે તેમની કુલ સંપત્તિ 100 બિલિયન ડોલરને પાર કરી ગઈ છે. તેની સંપત્તિમાં વધારો થવાનું કારણ રિલાયન્સના શેર તેના રેકોર્ડ ઉચ્ચ સ્તરે બંધ થવાનું છે. આજના ટ્રેડિંગ સેશનમાં રિલાયન્સ 2.64 ટકાના વધારા સાથે 2719.80 પર બંધ થયું.
ફોર્બ્સની અબજોપતિઓની યાદીમાં મુકેશ અંબાણી 105.2 અબજ ડોલરની સંપત્તિ સાથે વિશ્વના 11મા સૌથી ધનિક વ્યક્તિ છે. આજે તેમની સંપત્તિમાં લગભગ $2.7 બિલિયનનો વધારો થયો છે, જે વિશ્વમાં સૌથી વધુ છે. હાલમાં, 100 બિલિયન ડૉલર ક્લબમાં મુકેશ અંબાણી એકમાત્ર ભારતીય છે.
રિલાયન્સનું માર્કેટ કેપ રૂ. 18 લાખ કરોડને પાર કરી ગયું છે
રિલાયન્સ ઇન્ડસ્ટ્રીઝના શેરમાં તાજેતરના સમયમાં વધારો જોવા મળ્યો છે. છેલ્લા બે ટ્રેડિંગ સેશનમાં રિલાયન્સના શેરમાં 5.4 ટકાનો વધારો થયો છે. આજના સત્રમાં, BSE પર શેર 2.6 ટકાના વધારા સાથે 2,718.40 પર બંધ થયો હતો. દિવસના ટ્રેડિંગ દરમિયાન શેર રૂ. 2,724ની ટોચે પહોંચ્યો હતો. જેના કારણે કંપનીનું માર્કેટ કેપ 18 લાખ કરોડ રૂપિયાને પાર થઈ ગયું છે.
રિલાયન્સની સબસિડિયરી Jio Financial ના શેર પણ આજના ટ્રેડિંગમાં ઉછળ્યા હતા. Jio Financial Servicesનો શેર 4.7 ટકાના વધારા સાથે રૂ. 251.50 પર બંધ થયો હતો.
ગૌતમ અદાણી અને મુકેશ અંબાણી વચ્ચેનું અંતર વધ્યું
સંપત્તિમાં ઝડપી વધારાને કારણે ગૌતમ અદાણી અને મુકેશ અંબાણીની સંપત્તિમાં તફાવત વધી ગયો છે. ફોર્બ્સ બિલિયોનેર ઈન્ડેક્સમાં ગૌતમ અદાણી હાલમાં 79.4 બિલિયન ડોલરની નેટવર્થ સાથે દેશના 16મા સૌથી ધનિક વ્યક્તિ છે. મુકેશ અંબાણી અને ગૌતમ અદાણીની સંપત્તિમાં લગભગ 25 અબજ ડોલરનો તફાવત છે.
