શેરબજારમાં ઘટાડો શુક્રવારે સતત ચોથા દિવસે પણ ચાલુ રહ્યો હતો. માર્કેટમાં ભારે વેચવાલીના કારણે સેન્સેક્સ છેલ્લા ચાર દિવસમાં 1800 પોઈન્ટથી વધુ તૂટ્યો છે. સપ્તાહના અંતિમ દિવસે BSE સેન્સેક્સ 221.09 પોઈન્ટ ઘટીને 66,009.15 પોઈન્ટ પર બંધ થયો હતો. એ જ રીતે NSE નિફ્ટી 56.70 પોઈન્ટ ઘટીને 19,685.65 પોઈન્ટ પર બંધ થયો હતો. બજારમાં સતત ઘટાડાથી રોકાણકારોને ભારે નુકસાન થયું છે. તમને જણાવી દઈએ કે માર્કેટમાં ઓલ-રાઉન્ડ સેલિંગને કારણે રોકાણકારોને લાખો કરોડ રૂપિયાનું નુકસાન થયું છે.
બજાર કેમ ઘટ્યું?
જિયોજીત ફાઇનાન્શિયલ સર્વિસિસના રિસર્ચ હેડ વિનોદ નાયરે જણાવ્યું હતું કે, “ફેડરલ રિઝર્વના આક્રમક વલણ અને લાંબા ગાળાના ઊંચા વ્યાજ દરની સ્થિતિને કારણે સ્થાનિક બજારમાં ઘટાડો ઊંડો છે. આ સ્થિતિ ધીમી પડી રહેલી વૈશ્વિક અર્થવ્યવસ્થા માટે સકારાત્મક નથી.તેમણે જણાવ્યું હતું કે, “ઉચ્ચ મૂલ્યાંકન અને નરમાઈની યીલ્ડની ચિંતાએ જાહેર ક્ષેત્રની બેન્કો અને મધ્યમ અને નાની કંપનીઓના શેર પર પ્રતિકૂળ અસર કરી છે. ક્રૂડ ઓઈલના ભાવમાં વધારો અને ઉત્પાદક વિસ્તારોમાં ઓછા વરસાદને કારણે રોકાણકારોએ સાવચેતીભર્યું વલણ અપનાવ્યું છે. વિશ્વના અન્ય બજારોમાં નબળા સેન્ટિમેન્ટના કારણે સ્થાનિક બજારમાં સતત વેચવાલી જોવા મળી રહી છે. ભારત અને કેનેડા વચ્ચે વધી રહેલા તણાવની અસર પણ બજાર પર દેખાઈ રહી છે.
