હિમાદ્રી સ્પેશિયાલિટી કેમિકલ લિમિટેડ (એચએસસીએલ)નો નાણાકીય વર્ષ 2023-24ના સપ્ટેમ્બર ક્વાર્ટરમાં કોન્સોલિડેટેડ પ્રોફિટ આફ્ટર ટેક્સ ત્રણ ગણો ઉછળીને રૂ. 100.62 કરોડ થયો છે, જે ગત વર્ષે સમાન સમયગાળામા રૂ. 35.88 કરોડ હતો. જોકે, કુલ આવકો ઘટીને રૂ. 1,014.34 કરોડ થઇ છે, જે ગત વર્ષે સમાન ક્વાર્ટરમાં રૂ. 1,067.10 કરોડ હતી. એચએસસીએલે તેનો ખર્ચ પણ ગત વર્ષના રૂ. 994.81 કરોડથી ઘટાડીને રૂ. 875.24 કરોડ કર્યો છે.
કંપનીના સીએમડી અને સીઇઓ અનુરાગ ચૌધરીએ કહ્યું હતું કે, હિમાદ્રીએ નાણાકીય વર્ષ 2024ના બીજા ક્વાર્ટરમાં રૂ. 100 કરોડ પીએટીના સીમાચિહ્નને પાર કર્યું છે. અમારા વૈશ્વિક વિસ્તરણ સાથે અમે મજબૂત એનવાયર્નમેન્ટ, સોશિયલ એન્ડ ગવર્નન્સ (ઇએસજી) માળખાની રચના કરી છે. અમે વર્ષ 2050 સુધીમાં નેટ-ઝિરો હાંસલ કરવાનું મહાત્વાકાંક્ષી લક્ષ્ય નિર્ધારિત કર્યું છે, જેનું વચગાળાનું લક્ષ્ય વર્ષ 2025થી 2030 છે. અમારા પ્રદર્શનને જોતાં અમે અમારા વાર્ષિક લક્ષ્યાંકોથી આગળ છીએ.
કોલકત્તા સ્થિત એચએસસીએલ ગ્રીન એનર્જી, લી-આન બેટરી, કાર્બન બ્લેક, વિશેષ પ્રકારના ઓઇલ તથા ઔદ્યોગિક વપરાશની વિવિધ સામગ્રીઓના ઉત્પાદન અને સપ્લાયમાં કાર્યરત છે.
